Театрга чакырган «кыз» миллион сумлык тозак корган: мошенниклар эш итә

Театрга барырга теләп, 1 миллион сумнан артык акчасын мошенникларга биргән.

Татарстан буенча Эчке эшләр министрлыгы мәгълүматларына караганда, ир-ат социаль челтәрдә бер кыз белән танышкан. Әңгәмә барышында кыз аны театрга барырга чакырган һәм билетлар сатып алу өчен сылтама җибәргән.

Түбәнкамалы әлеге сылтама аша кереп, 4 мең сум түләгән, әмма билетлар аңа килмәгән. Шуннан соң мошенниклар «техник ярдәм хезмәте» булып элемтәгә чыккан һәм янәсе акчаны кире кайтару өчен кайбер күрсәтмәләрне үтәргә кирәк. Ышанган ир-ат мошенникларның әмерен үтәгән. Нәтиҗәдә аның барлык акчасы юкка чыккан, ә зыян күләме 1 миллион 59 мең сум тәшкил иткән.

Мошенниклар белән язышу юкка чыкканнан соң гына ир-ат алдануын аңлаган. Хәзерге вакытта әлеге факт буенча җинаять эше кузгатылган.