Укучының букчасы күпме авырлыкта булырга тиеш?

Мәктәп букчасын сайлаганда аның авырлыгына, арка өлешенә, җилкә каешларына һәм яктылык кайтаручы элементларына игътибар итәргә кирәк. Роспотребнадзор белгечләре укучылар өчен букча сайлау таләпләрен искә төшерде.

Башлангыч сыйныф укучысы букчасы күпме авырлыкта булырга тиеш?

Башлангыч сыйныф укучылары өчен буш букчаның авырлыгы 700 граммнан артмаска, ә урта һәм өлкән сыйныф укучылары өчен 1 килограммнан артмаска тиеш.  

Мәктәп букчасының арка өлеше нинди булырга тиеш?

Кечкенә балалар өчен букчаның арка өлеше формасын саклый торган һәм каты эчке өлешле булуы мөһим. Мондый конструкция букчаның аркага тыгыз ятуын һәм дәреслекләр авырлыгын тигез бүлүне тәэмин итә.

Букчаның җилкә каешларын ничек сайларга?

Каешлар киң, йомшак һәм озынлыгы көйләнә торган булырга тиеш. Бу баланың аркасына һәм җилкәләренә артык йөк төшүен киметергә ярдәм итә.  

Букчада яктылык кайтаручы элементлар кирәк

Баланың юлдагы куркынычсызлыгы өчен букчада яктылыкны кире кайтара торган элементлар булуы мөһим. Алар букчаның алгы һәм ян-як өлешләрендә, шулай ук өске клапанында урнашырга тиеш.

Уку әсбаплары белән букча күпме авырлыкта булырга тиеш?

Роспотребнадзор тәкъдимнәре буенча, китаплар, дәфтәрләр һәм язу кирәк-яракларын кертеп, букчадагы гомуми йөк түбәндәге чикләрдән артмаска тиеш:

• 1-2нче сыйныфлар — 1,5 килограмм;

• 3-4нче сыйныфлар — 2 килограмм;

• 5-6нчы сыйныфлар — 2,5 килограмм;

• 7-8нче сыйныфлар — 3,5 килограмм;

• 9-11нче сыйныфлар — 4 килограмм.