Апаста Иделъарягы халык театрларының беренче фестивале узачак

– Әлеге фестивальнең беренче максаты – күренекле актриса Асия Хәйруллинаның исемен мәңгеләштерү, аның мирасын саклау һәм яңа буынга тапшыру, – дип билгеләп үтте Апас районы башкарма комитеты җитәкчесенең социаль мәсьәләләр буенча урынбасары Гөлүсә Галләмова журналистлар белән очрашуда. – Асия Хәйруллинаның тууына быел 105 ел була, шулай ук тагын бер юбилей датасы көтелә – Апас халык театрына нигез салынуга 55 ел тула. Шушы ике күркәм датаны берләштереп, якташыбыз исемендәге фестивальне оештырырга булдык.  

Чарага Иделъарягы районнары: Яшел Үзән, Кайбыч, Кама Тамагы, Буа, Чүпрәле, Тәтеш, Апас һәм Югары Ослан татар халык театрлары коллективлары чакырылачак. Бу үзенә күрә бер тәҗрибә алмашу һәм һөнәри үсеш мәйданчыгы да булып торачак, ди оештыручылар.
Гөлүсә Галләмова әйтүенчә, фестиваль кысаларында балалар коллективларына аерым игътибар биреләчәк. Республиканың танылган аетерлары һәм режисерлары алар өчен осталык дәресләре үткәрәчәк. Бу балаларга текст белән эшләргә, үзләрен сәхнәдә тотарга, тел байлыкларын арттырырга ярдәм итәр дип ышанабыз, диде ул.   

Районнар театрлары үзләренең иҗади эшләрен октябрь һәм ноябрь айларында Апас мәдәният йорты сәхнәсендә күрсәтәчәк.
Фестивальгә йомгак 10 декабрьдә – Апас халык театрының 55 еллык юбилеен бәйрәм итү кысаларында ясалачак.    

Район башкарма комитетының мәдәният бүлеге башлыгы Рөстәм Мингазиев Апас халык театрының «Идел-йорт» төбәкара фестиваль-конкурсында актив катнашуын һәм җиңүче булуын билгеләп үтте. “Театр районнарга гына түгел, күрше Ульяновск, Түбән Новгород өлкәләренә дә йөри. Ел саен театр айлыклары үткәрелеп килә. Районда 56 мәдәният йорты актив эшли”, – дип ассызыклады ул.

Фестивальне йомгаклау тантанасында, спикер сүзләренчә, һәр театр коллективын аерым номинацияләр белән бүләкләячәкләр. Киләсе елларга фестивальне сигез район белән генә чикләнмичә, республика күләмендә үткәрү нияте барлыгын да яшермәде