Казанда «Театр сәнгате төне»: күргәзмәләр, лекцияләр һәм бушлай чаралар башлана

Проект Татарстан Республикасы Дәүләт сынлы сәнгать музее белән В.И.Качалов исемендәге Казан академия рус зур драма театры тарафыннан берлектә оештырыла. Бу хакта Казан мэриясе сайты хәбәр итә. 

Быелгы чара берьюлы өч мөһим вакыйгага багышлана: Бөтендөнья театр көне, Россия Театр эшлеклеләре берлегенең 150 еллыгы һәм Качалов исемендәге театрның 235 еллыгы.

Акция кысаларындагы беренче вакыйга – Качалов театры актеры, режиссеры һәм «Алтын битлек» премиясе лауреаты Илья Славутскийның иҗади эшчәнлегенең 20 еллыгына багышланган фотокүргәзмә ачылышы. Экспозиция 13 мартта 15:30 сәгатьтә Татарстан Республикасы Дәүләт сынлы сәнгать музееның Заманча сәнгать галереясендә (Карл Маркс ур., 57) тәкъдим ителә.

Күргәзмәдә 60 фотосурәт урын алачак. Алар арасында артистларның портретлары, сәхнә арты тормышын чагылдырган репортаж кадрлары һәм театрны аерым бер сәнгать дөньясы буларак ачып биргән эшләр бар. 16:00 сәгатьтә автор үзе кунаклар өчен экскурсия үткәрәчәк. Чарага керү ирекле.

Проектның икенче өлеше – «Театр дөньясы – музей дөньясы» дип аталган киң колачлы экспозиция. Ул театр костюмнарын мөстәкыйль сәнгать әсәре итеп тәкъдим итүгә багышлана. Тантаналы ачылыш 19 мартта 15:00 сәгатьтә музейның төп бинасында – Сандецкий утарында (Карл Маркс ур., 64) узачак.

Күргәзмәдә Качалов театры өчен танылган рәссамнар – Александр Патраков, Владимир Никитин, Эрнст Гельмс һәм башка осталар эскизлары буенча эшләнгән уникаль костюмнар тәкъдим ителәчәк. Аларның күбесе рус һәм чит ил классикасы буенча куелган күренекле спектакльләрдә кулланылган.

Ачылу тантанасына керү бушлай. Ә 20 марттан күргәзмәне музейга гадәти билет белән карап булачак.

«Театр сәнгате төне» акциясе кысаларында шулай ук лекцияләр, концертлар, остаханәләр, экскурсияләр һәм балалар өчен махсус дәресләр уздыру планлаштырыла. Чараларның тулы программасы белән Татарстан Республикасы Дәүләт сынлы сәнгать музееның рәсми сайтында танышырга мөмкин.

Билгеле булганча, Татарстанда «Гаилә» илкүләм проекты гамәлгә ашырыла.

Денис Гордийко фотосы