Быел Татарстанда яңа мәктәпләр кайларда төзеләчәк?

Быел республика бюджеты, Россиянең «Авыл территорияләрен комплекслы үстерү» дәүләт программасы, «Гаилә» илкүләм проекты хисабына 2 810 укучыга исәпләнгән 6 мәктәп (шул исәптән гамәлдәге мәктәпкә 618 урынлы өстәмә корпус) һәм 3 балалар бакчасы (гомуми куәте 820 урын) төзү каралган.

Бу хакта журналистлар белән очрашу вакытында Татарстан Мәгариф һәм фән министры Илсур Һадиуллин хәбәр итте.

Гомуми белем бирү объектлары түбәндәге районнарда төзеләчәк:

• Әгерҗе шәһәрендә 500 урынлы мәктәп;

• Минзәлә шәһәренең Садак микрорайонында 500 урынлы мәктәп;

• Буа шәһәрендә 192 урынлы мәктәп;

• Казан шәһәренең «Станция Спортивная» торак комплексында 500 урынлы мәктәп;

• Кукмара районы Манзарас авылында 500 урынлы мәктәп;

• Бөгелмә районы «2 нче лицей»га 618 урынлы өстәмә корпус.

Питрәч районы Көек авылында 340 урынлы балалар бакчасы (2025–2027 еллар), Яшел Үзән районы Октябрьский бистәсендә 260 урынлы балалар бакчасы (2025–2027 еллар), Алабуга шәһәрендә 220 урынлы балалар бакчасы сафка бастырылачак.