Быелгы “Халыклар дуслыгы” фестивале үзәгендә – барлыгы 15 милләт

Биредә, 2017 елдан башлап, укучылар катнашында “Халыклар дуслыгы фестивале” оештырыла.

Уку йорты бүген чын мәгънәдә “кайнап тора”. Коридорларында татар, рус, мари, үзбәк, чуаш, белорус, казах, кыргыз киемнәренә, хәтта Марокко һәм Кытайдагыча киенгән укучыларны очратырга мөмкин иде. Быелгы “Халыклар дуслыгы” фестивале үзәгендә –  барлыгы 15 милләт.

Җирәбә буенча бу халыклар 1-8 һәм 10нчы сыйныф укучыларына бүлеп бирелгән. Укучыларның бурычы күргәзмә һәм сәхнәдәге чыгышлары аша бу милләтләрнең үзенчәлекләрен чагылдыру иде. Махсус жюри һәр сыйныфның тырышлыгын, үзләренә туры килгән халыкны никадәр ача  алуын бәяли. Әмма кемнедер аерып күрсәтү шул кадәр авыр! Берсе дә ким түгел, барысы да шул кадәр җентекләп әзерләнгән. Күргәзмәдә тәкъдим ителгән өстәлләре сыгылып тора: монда берничә төр милли ризык та, шул халыкның савыт-сабалары, флагы, гербы, милли атрибутлары урын алган. Сәхнәдә дә балалар үзләренә туры килгән халыкларның телләрен дә, җыр-биюләрен дә, мәдәниятен дә искиткеч чагылдыра алды.  

Гимназия директоры Зөммәрәт Нәгыймова билгеләп үткәнчә, биредә укучыларның 90 проценты татарлар, әмма араларында рус, белорус, азәрбәйҗан һәм үзбәк балалары да бар.  Барлыгы 450гә якын бала белем ала.

- Балаларны туплау, халыклар арасындагы дуслыкны ныгыту өчен мондый чаралар бик кирәк дип саныйм. Балалар да, ата-аналар да фестивальдә бик теләп катнаша. Җирәбә буенча туры килгән халыкларның үзенчәлекләрен өйрәнәләр – азмы-күпме аларның телләрен үзләштерәләр, аш-суларын әзерлиләр, милли атрибутларын табалар. Киемнәрен йә сатып алып, йә үзләре тегеп күргәзмә һәм концертка әзерләнәләр, - дип сөйләде Зөммәрәт Нәгыймова.

Ел саен милләтләрне төрлеләндерергә тырышалар икән. Рус һәм татар милләте ел да күрсәтелә, аннары төрле төбәкләрдә гомер иткән татарлар белән дә таныштырырга тырышалар – узган елда Самара татарлары тәкъдим ителсә, быел Кырым татарлары сайланган. Чит илләргә килгәндә, Быел аларны БРИКС илләре арасыннан сайлап алганнар. Директор укучыларның һәм әти-әниләрнең тырышлыгын югары бәяләде.