Илсур Һадиуллин 9нчы сыйныфны тәмамлаучыларга: “Хәйлә юлы белән техникумнарга укырга керәм дип уйламагыз”

Быелдан 9 нчы сыйныфны тәмамлаучылар дүрт имтихан урынына икене генә тапшыра алачак. Әмма бу яңалык барлык бар укучыларга да кагылмаячак. Ике сынау белән генә нинди көллиятләргә укырга кереп булачак, дигән сорауга Татарстан мәгариф һәм фән минстры Илсур Һадиуллин ачыклык кертте.

– Ике имтихан тапшыру мөмкинлеге эшче һөнәр сайлаучыларга бирелә. Әлеге исемлектә 40 белгечлек бар. Ике имтихан тапшыручыларны республикада барлыгы 51 көллият кабул итәчәк. Әмма, әйтик, педагогика, медицина, IT, нефть өлкәсе белгечләрен әзерли торган уку йортларына кереп булмаячак. Исемлек министрлык тарафыннан расланган. Әгәр дә син без раслаган белгечлек буенча кермисең икән, дүрт имтихан бирергә тиеш, – дип аңлатты министр.

10нчы сыйныфка барырга исәп тотучыларны да ике сынау белән генә алмыйлар. Җәй дәвамында кире уйлаган очракта, 8–9 июльдә өстәмә ике имтихан тапшыру мөмкинлеге биреләчәк. 

– Монда яхшылап уйларга кирәк. Ике генә сынау бирәм дә котылам дип түгел. Имтихан бирүчеләрнең исемлеге көллиятләрдә булачак. Мәсәлән, Һадиуллин ике генә имтихан биргән, ди. Мин инде педагогика, медицина юнәлеше буенча бара алмыйм. Моны уку йортларының җитәкчеләре дә, министрлык та беләчәк. Шуңа күрә алдау, хәйлә юлы белән техникумнарга керү юлы булмаячак, – диде министр.