«Пушкин картасы» Татарстанда рекорд куя. 400 мең карта, миллионлаган билет сатылган

2026 елның беренче яртыеллыгында республикада 400 меңгә якын карта чыгарылган, мәктәп укучылары һәм студентлар тарафыннан меңләгән мәдәни чарага билетлар сатып алынган.

Татарстан Республикасы мәгариф һәм фән министры урынбасары Алсу Асадуллина хәбәр иткәнчә, республика буенча программада 18 яшькә кадәрге 116 751 мәктәп укучысы теркәлгән. Быелның апрель аенда гына да «Пушкин картасы» ярдәмендә 95 меңнән артык билет сатып алынган. Иң актив кулланучылар – 15-16 яшьлек үсмерләр.

Искәртеп узабыз, Пушкин картасы яшьләргә ел саен 5 мең сумга төрле мәдәни чараларга билетлар сатып алырга мөмкинлек бирә. Программа кысаларында укучылар өчен төрле мәдәни маршрутлар оештырыла. Алар арасында «Созвездие-Йолдызлык» арт-резиденциясенә, Галиәсгар Камал театрына коллектив сәфәрләр, «Бөтен сыйныф белән кинога» акциясе, музейлардагы һәм китапханәләрдәге күргәзмәләр, классик һәм заманча музыка концертлары бар.

Татарстан Республикасы мәдәният министрының беренче урынбасары Юлия Әдһәмова быелның 4 ае нәтиҗәләрен яңгыратты. Татарстан картаны актив кулланучылар саны буенча Россиядә ышанычлы рәвештә 4нче урынны алып тора, ул тик Мәскәү, Санкт-Петербург һәм Краснодар краеннан гына калыша. Программада катнашучы яшьләр өлеше буенча республика илдә 2нче урында  тора.

Татарстанның муниципаль районнары арасында сатылган билетлар саны һәм алынган керем күләме буенча түбәндәге лидерлар теркәлгән:

1.Чаллы — 14 705 билет (11 505 250 сумлык).

2.Чистай районы — 9 264 билет (3 071 100 сум).

3.Түбән Кама районы — 8 259 билет (3 329 158 сум).

4.Тәтеш районы — 7 155 билет (2 342 760 сум).

5.Әлмәт районы — 6 215 билет (1 957 960 сум).

2026 ел башыннан программа операторы вазифасын ВТБ банкы башкара. Банк мәгълүматлары буенча, бүген Татарстанда 14-22 яшьлек яшьләрнең 69 проценты «Пушкин картасы» иясе. Республика әлеге күрсәткеч буенча Россия төбәкләре арасында лидерлар рәтендә тора.

Казан Кремле музей-тыюлыгының «Пушкин картасы» буенча эш тәҗрибәсе дә тәкъдим ителде. Бүген музей-тыюлыкта мәктәп укучылары өчен махсус экскурсияләр, тарихи квестлар, интерактив дәресләр һәм күчмә программалар гамәлгә ашырыла. Проект башланганнан бирле Казан Кремле мәйданчыкларында «Пушкин картасы» буенча 103 төрле программа үткәрелгән, аларга 4,5 меңнән артык билет сатылган.

2026 елның икенче яртыеллыгында вуз студентларын тулысынча яңа карталар белән тәэмин итү, югары уку йортлары белән мәгълүмати эшне көчәйтү ниятләнә. Чөнки бу категория Пушкин картасын куллану активлыгы ягыннан калыша.