Техник юнәлешләргә кызыксынуны грантлар ярдәмендә арттыралар

Татарстанда техник фәннәргә кызыксыну арта. Моны математика, физика һәм информатика предматларыннан БДИ (ЕГЭ) тапшыручылар санының өлеше үзгәрүе дә күрсәтә, ди Татарстан мәгариф һәм фән министры Илсур Һадиуллин.

- 2024 елда математикадан БДИны чыгарылыш сыйныф укучыларының 50 проценты тапшырган булса, 2025 елда бу күрсәткеч 56 процентка җитте. Физиканы укучыларның 16,5 проценты, информатиканы 22,9 проценты сайлады. Әлеге нәтиҗәләр укучыларның әлеге фәннәргә карата кызыксынуы артуын ачык чагылдыра, - ди министр.

Белүебезчә, узган уку елында “Физик-математик алгарыш” проекты уңышлы гына тормышка ашырыла башлады. Бу проект өчен республика бюджетыннан 252 млн сум күләмендә акча бүлеп бирелде.

Проект биш юнәлеш буенча тормышка ашырыла: 7- 9 сыйныфларда физмат класслар ачу, 5-7 сыйныфларда математик түгәрәкләрне эшләтү, укучыларга активлыклары өчен 50 мең сум күләмендә премия (5-11 кл), укытучыларга һәм мәктәпләргә грантлар.

Проектның төп максаты: балаларда математика һәм төгәл фәннәргә карата кызыксыну уяту һәм аны үстерү, имтиханнарда шушы предметларны сайлауны, югары уку йортларына кергәндә төгәл фәннәр белән бәйле юнәлешләргә өстенлек бирүен арттыру. Узган уку елында 200 укучы 50 шәр мең сум премия алды, 350 укытучы (300 мең, 250 мең, 90 мең) һәм 40 мәктәп (600 мең һәм 1 млн сум һәрберсе) грантларга лаек булдылар.

Проект әлегә 3 ел гамәлдә булачак дип билгеләнгән.

- Бер ел гына тормышка ашырылуына карамастан, “Физик-математик алгарыш” проекты көткән нәтиҗәләрне бирергә мөмкин дигән фикергә килдек. Чөнки укучыларның математика/физика фәненә карата кызыксынулары сизелерлек артты, имтиханны сайлауда үзгәрешләр уңай якка бар, олимпиадаларда катнашучылар артканнан арта. Ләкин бер елда гына зур нәтиҗәләр көтеп булмый, еллар үтү кирәк. Уку йортларына кергәндә төгәл фән булган юнәлешләрне сайлау һәм шул белгечлек буенча эшкә урнашып хезмәт итүчеләр саны проектның күрсәткечләре булып тора, - дип белдерде Татарстан мәгариф һәм фән министры.

Хәзерге вакытта “Физик-математик алгарыш” форматында “Физик-химик алгарыш” проекты әзерләнгән, аңа старт бирелгән. Республика бюджетыннан өч елга 1,5 млрд сум бүлеп бирелгән. 2026 елда бу проектны тормышка ашыруга 572 млн сум тотылачак.