Айсылу Хафизова: «Бездә кинематографистлар бар, ә киноиндустрия юк»

- Бездә кинематографистлар бар, ә киноиндустрия юк. Казан кинохроника студиясе уңышлы гына эшләп килде, анда документаль фильмнар төшерелә иде. Хәзер дә Казан кинохроника студиясе архивы бай. Бу фильмнарны Татарстанныкы итеп кулланырга булыр иде. Әмма студия ликвидацияләнеп, аның байлыгы таралды. Тарихи экспонатлар булырлык җайланмалар шулай итеп юкка чыкты, - ди Айсылу Хафизова. - Документаль кинематография бездә 30нчы еллардан ук бар. Ә уен фильмына килгәндә, уңышлы проект итеп, Илдар Ягъфәровның «Күктау» фильмын саныйм. Бу фильмнан соң уен кинематографы бар дияргә була.

Аның фикеренчә, бездә энтузиастлар үз хисабына кино төшерергә мәҗбүр.
- Татарстанда кино сәнгате финансланмый. Ел саен бүленеп бирелә торган 8 млн акча чынлыкта бер тулы метражлы фильм бюджеты дияргә була. Мәскәүдә сериалның бер сериясе өчен сценаристка 5-15 мең доллар күләмендә гонорар түләнә! Татарстан хөкүмәтенең кино сәнгатенә игътибары җитеп бетми дип саныйм. Җитди мөнәсәбәт юк, - дип басым ясады ул.

^{Гөлнар Гарифуллина, «Татар-информ».}