"Бүген - тарихи вакыйга, масштаблы проектка нигез салабыз..."

"Бүген - тарихи вакыйга, масштаблы проектка нигез салабыз. Аның нәкъ менә Казанда башланып китүе табигый, чөнки Казан элек-электән Шәрык дөньясының мәдәни, мәгърифәти үзәге булган. Казан, татар халкы гомер бакый Шәрык дөньясын Европа цивилизация белән тоташтырып торучы күпер ролен үтәгән. Безнең фестиваль дә Казанда башланып, үзенең нурларын кояш чыгышына да, кояш баешына да юнәлтер дип өметләнәбез", - диде Рифат Фәттахов.

Фәрит Мөхәммәтшин фикеренчә, Рифат Фәттахов оештырган чаралар һәрвакыт халык тарафыннан уңай кабул ителде. "Чит илләрдә яшәүче татарлар гына түгел, башка милләт вәкилләре дә бу фестивальнең кирәк икәнен тоеп кабул итәрләр дип ышанып калам", - диде Фәрит Мөхәммәтшин. Ул Рөстәм Миңнехановның сәламләү хатын укыды.

"Шәрык базары" төрки халыкларның заманча җыр сәнгатен үстерүгә этәргеч биргән, аларның мәдәни элемтәләрен ныгытырга ярдәм иткән күренекле вакыйга булыр дип ышанам. Борынгы Казан шәһәре фестивальдә катнашучылар күңелендә иң җылы тойгылар, якты хатирәләр булып каласына, ә күпсанлы тамашачылар, матурлык һәм рухият бәйрәме белән хозурланып, матур тәэсирләр алачагына шик юк. Сезгә бәхет, иминлек, яңа ачышлар һәм казанышлар телим!" дип язылган Рөстәм Миңнеханов сәламләвендә.

Тантаналы ачылышта шулай ук төрки телле илләрнең һәм төбәкләрнең вәкилләре чыгыш ясады. Казахстанның халык артисты Роза Рымбаева, Үзбәкстанның халык артисты, "Ялла" төркеме солисты Фаррух Закиров фестиваль кунакларын музыкаль видеокотлау аша сәламләде.

"Без төрле әләмле илләрдә яшибез. Әмма без - төрки халыклар, безне тел белән дин берләштерә. Эш башлаганда - без "Бисмиллаһ", эш тәмамлаганда - "Аллаһка шөкер" дип әйтәбез. Фестивальнең нәкъ менә Татарстанда башлануы бик әһәмиятле, чөнки киләсе елда биредә Ислам динен кабул ителүнең 1100 еллыгына багышланган чаралар узачак", - диде Төркиянең Казандагы генераль консулы Исмет Эрикан.

Фестиваль ачылышында махсус әлеге проект өчен иҗат ителгән фестиваль гимны яңгырады. Аны Алинә Шәрипҗанова, Айдар Сөләйманов һәм Миләүшә Таминдарова җитәкчелегендәге ТР дәүләт камеры хоры башкарды. Моннан тыш, төрле халык вәкилләре үз телләрендә җыр башкарды. Гомумән, фестивальдә Төркия, Азәрбайҗан, Казахстан, Үзбәкстан, Кыргызстан, Төрекмәнстан, Финляндия, Германия һәм 10 төбәге белән тәкъдим ителүче Россия илләре катнаша.

Фестивальнең максаты - Россия халыклары арасында дуслыкны ныгытуга, милләтара хезмәттәшлекне үстерүгә, Россиянең халыкара абруен күтәрүгә ярдәм итү. "Казанда Шәрык базары" Халыкара төрки эстрада фестиваленең гала-концерты 2022 елның җәендә узар дип көтелә.

Фестивальнең ачылышы "Туган тел" җыры белән тәмамланды. Аны кунаклар аягүрә басып тыңлады.