Кирам Сатиев пенсиягә җыена

- Бакча сезонын ачтык. Щербаковка бистәсендә 7 сутыйлы бакчабыз бар, - дип сөйләп китте Кирам абый, - Шуның бер сутыена бәрәңге, калганына кишер, суган, редис утырттык, тагын бер сутыенда чәчәкләр. Гөлшат апагыз җәй буе үстерә дә, көз җиткәч, чыгарып түгә. Яшелчәләр утырткан көнне Ходайдан яңгыр сораган идем. Аллага шөкер, кичә бик әйбәт яңгыр явып узды. Бакча башында гына Казансу елгасы. Төнге икедә, өчтә кошлар сайраганга уянып китәм дә, күзне йокы алмый, тыңлап ятам. Бернинди симфоник оркестр кирәкми, минәйтәм.

Казан дәүләт мәдәният һәм сәнгать университетында укытам. Бездә «урак өсте»: зачет, имтиханнар башланды. Эшләребез тыгыз. Рәшит Ваһапов исемендәге фестивальдә өч укучыбыз призлы урыннар алып кайтты. Икесе - икенче, берсе өченче урын лауреатлары.

Алла боерса, 21 июльдә 60 яшь тула, пенсия яше дә куып җитте. Шул уңайдан 23 ноябрьдә Филармония концертлар залында иҗат кичәм булачак.