Китапка автор җанының бер кисәкчеге салынган

Ә менә күптән түгел генә Татарстан китап нәшрияты табасыннан  шундый китап төште. "Полотенце в семь цветов" дип аталган  әлеге җыентыкка  балалар өчен язучы шагыйрьләрнең шигырьләре тупланып бирелгән. Үзе дә танылган балалар шагыйре, шактый китаплар авторы  Борис Вайнер тәрҗемәсендә. Аз да түгел, күп тә түгел, төп-төгәл 20 автор. Бөек Тукайдан, батыр Җәлилдән башлап, классикларыбыз Шәүкәт Галиев, Роберт Миңнуллинга кадәр. Ханәфи Бадигый, Хәйдәр Гайнетдинов, Рөстәм Мингалим һәм бүген балалар шигърияте арбасын җигелеп тартучы: Разил Вәлиев, Равил Фәйзуллин, Нәкыйп  Каштанов, Ленар Шәех, Эльмира Шәрифуллина, Рафис Корбан шигырьләре дә урысча сөйләшкән әлеге китапта.

Гәрәй Рәхим, Гөлшат Зәйнәшева, Ренат Харис спектакльләреннән җырлар да бирелгән. Ә иң сөенечлесе минем дә ике шигыремә урын тапканнар рәхмәттән башка сүзем юк. Шуңа да Бауман урамындагы китап кафе ресторанында булган әлеге җыентыкны тәкъдим итү кичәсенә бик теләп бардым, исән-сау булган башка авторлар белән дә күрешеп - сөйләшү иде  уем. Ләкин бу китап мәҗлесенә авторлардан Нәкыйп Каштан гына килгән иде. Кызганыч, Борис Вайнер үзе дә сәламәтлеге аркасында, бу шатлыгын безнең белән бергәләп уртаклаша алмады. Ярый әле, тормыш иптәше шулай ук шагыйрә Наилә Ахунова тырышлыгы белән  яңа китап бәйрәме бик җанлы узды.

Китап матур булсын, аны балалар яратсын өчен, рәссамнар да нык тырыша. Әлеге китапны Фәридә Харрасова аллы-гөлле итеп бизәгән. Һәр битеннән күңелгә нур тулырлык итеп. Фәридә ханым балалар китабын матурлату буенча кулы җиңел рәссам. Ленар Шәехның "Галинең песие" дигән китабы Халыкара танылу алып, Андерсен Дипломына ия булган икән, монда рәссамның да роле зур, билгеле. Шуңа да талантлы Фәридәнең  чыгышын бик игътибар белән тыңладык. "Насыйп булып чыга калса яңа китапларыбызны аңардан бизәтергә кирәк әле", - дип Нәкыйп Каштан белән план да тезеп куйдык.

Бәйрәмдә очраклы кешеләр юк, барысы да  Борис Вайнерның үзен дә, иҗатын да яхшы белүчеләр генә җыелган иде. Барыбыз да аңа  ихластан  ныклы сәламәтлек,  китапка  зур уңышлар теләдек. Яңа ел  алдыннан теләкләр кабул була диләр бит.