Премьера: "Сәхнәдә “тәти” мәхәббәт кенә түгел, хыянәт, нәфрәт темалары да булырга тиеш..."

Актерлар өчен бу бик зур сынау. Шигырьнең рифмасын саклап, тамашачыга автор идеясен дә җиткерергә кирәк. “Мәдинә” татар театрларында уйнала торган драмалардан бик нык аерыла. Чиста, саф, эчкерсез мәхәббәт турында театр сәхнәләрендә матур үрнәкләр күп, ләкин гөнаһ һәм иман, намус һәм җаза арасында бәргәләнгән геройларны күрсәтүче спектакльләребез аз. 
- Илгиз Газинурович әсәрне үземә җибәргәч, роль башкарырга каршы килдем. Бу татар театры, тамашачысы өчен кирәк әсәрме, дип уйландым. Ләкин сәхнәдә “тәти” мәхәббәт кенә түгел, хыянәт, нәфрәт темалары да булырга тиеш, – диде “Мәдинә” драмасында төп рольне башкаручы Резедә Сәләхова.

Билгеле, әсәрдә мәхәббәт темасы урын алгач, өчпочмаксыз булмыйдыр. Спектакльдә Мәдинә белән Җәүдәт (төп геройлар) гаилә кормый. Драма туйдан башланса да, Җәүдәт Мәдинәгә өйләнми. Мәхәббәттә дә тормыш агышындагы кебек сынаулар була. Геройлар сайлаган юл, аларны фаҗигагә илтә. 
- Мәхәббәт зур бәхет кенә түгел, фаҗига алып килергә дә мөмкин. Гыйбрәтле хәлне күзәтеп, тамашачыларыбыз дөрес нәтиҗәләр ясый алыр, дип уйлыйм. Барыгызны да көтеп калабыз, - диде драмада төп рольне башкаручы Артем Пискунов.

Фәлсәфи эчтәлекле драма тамашачыны уйланырга этәрәчәк. Барлык әдәби әсәрләр кеше язмышына нигезләнә. “Мәдинә” спектакленең сюжеты чынбарлыкның ачысын да, төчесен дә күрсәтә. Шуңа күрә әсәрне 18 яшьтән өлкәнрәкләр өчен карау киңәш ителә.

Илгизә Галиуллина