#Мәдәният 04 апрель 2022, 18:37

Рафинат Сәлахов дусларын Сабага җыйды

04 апрель 2022, 18:37

Рафинат Сәлахов исеме күпләргә бик яхшы таныш. Кемдер аны атаклы җырчы Илһам Шакировның танылган баянчысы буларак белә. Мәдәният-сәнгать өлкәсендә киңкырлы белгечне без әле оста педагог, балаларга курай серләренә өйрәтүче остаз буларак та таныйбыз. Бу көннәрдә танылган композитор, балалар өчен язылган бик күп җырлар авторы үзенең юбилей кичәсен туган ягы – Сабада үткәрде.

Скопировать ссылку

Баянчы, курайчы, композитор, педагог, җәмәгать эшлеклесе – Рафинат Сәлахов төрле елларда мәдәният өлкәсенең төрле тармакларында хезмәт куя. 1975 елдан башлап төрле җырчылар – Габдулла Рәхимкулов, Флюра Сөләйманова, Зөһрә Сәхәбиева, Таһир Якупов һәм башка бик күп җырчылар белән эшли. Илһам Шакировта ул 12 ел баянчы булып тора. Ике йөзләп җырга көй иҗат иткән, шуларның сиксәнгә якыны – балалар һәм яшүсмерләр өчен язылган. Башкалабыз Казан мәктәп-гимназияләрендә соңгы 20 ел дәвамында балаларга курай серләренә төшендерә һәм укучыларга җырлар өйрәтә.

Халыкара һәм Бөтенроссия конкурслары лауреаты Рафинат Сәлаховның Сабадагы юбилей концерты бер тында узды да китте. Бик тә зәвыклы, кабатланмас кичә булды ул. Рафинат абыйның үтә дә тыйнаклыгы, гадилеге тамашачыны тагы бер кат сокландырды. Саба сәхнәсендә бер-бер артлы легендар шәхесләр, танылган җырчылар Рафинатның көйләренә язылган җырларны башкардылар. Нәфис сүз остасы Рәшит Сабировның да чыгышларын сагынганбыз икән. Халык артисты Асаф Вәлиев, яшь талантлы башкаручылардан Сиринә Зәйнетдинова чыгышы да сокландырды. Шулай ук якташларыбыз Теләче кызы һәвәскәр композитор Чулпан Фәйзулгатованың үзенчәлекле чыгышы күңелдә калды. Татарстанның атказанган артисты Фәрит Мирзануров башкаруында “Минем гүзәл Миңгәрем” җыры сабалыларга бүләк булды, дисәк тә була.

Рафинат абый озак еллар музыкант, педагог, курайлар ясаучы мастер Рафаэль Гыйзетдинов белән хезмәттәшлек итә. Рафаэль абыйның эчкерсез ихлас чыгышы да онытылмаслык булды. Ул юбилярга да, Саба төбәгенә үзе ясаган курайларын бүләк итте.

Юбилярны котларга Бөтендөнья Татар Конгрессы, Язучылар һәм Рәссамнәр берлеге вәкилләре кайткан иде. Шулай ук авылдашлары, якташларының хөрмәтен күрү дә күңелдә үтә дә җылы хисләр калдырды. Алар танылган якташлары белән очрашуны туган авылы Юлбат мәктәбендә дә үткәрелүен, җирле радиода “Үзебезнекеләр” тапшыруында зур кунак булып эфирга чакырылуын да искә алдылар.

Танылган алып баручы Рәшит Сабиров әйткәнчә, “Туган якка кеше кайта ул!” Рафинат абый бу көннәрдә чын мәгънәсендә туган ягына кайтты. Читтә йөреп, иҗат дәрте белән янучы кешеләргә туган якның бер җылы карашын тою да җитә.