"Республикабызның ярдәме кирәк": Президент яшьләр белән очрашты

Рөстәм Нургали улына иң беренче булып яшь композитор, педагог Миләүшә Хәйруллина мөрәҗәгать итте. Ул күптән түгел “Партитура” яшь композиторларның Бөтенроссия конкурсында “Опера” номинациясендә җиңү яулаган.
– Шушындый зур бәйгедә җиңү – безнең өчен зур шатлык. Минем өчен бу бик мөһим, чөнки без татар әсәре белән җиңдек, Мәскәүдә туган телебездә Кави Нәҗми һәм аның хатыны Сәрвәр Әдһәмова турында җырладык. Менә шундый зур тарихны күрсәттек. Иң зур теләгем – шул әсәрне Казанда, Татарстанда күрсәтергә, чөнки мин аны татар халкы өчен яздым. 20 гасыр тарихына багышланган опералар, музыкаль әсәрләр бик сирәк. Без мәшһүр кешеләрне белергә, өйрәнергә тиешбез. Әмма мин мондый зур проектны берүзем күтәрә алмыйм. Республикабызның теләктәшлеге һәм ярдәме кирәк, – диде Миләүшә Хәйруллина. 

Президентыбыз нинди ярдәм кирәк булуы белән кызыксынды. Мәдәният министры Ирада Әюпова белдергәнчә, бу – акчалата ярдәм. Суммасы – 7 миллион сумнан артык. Рөстәм Миңнеханов ярдәм булыр дип ышандырды.

“Барс-рекордс” ҖЧҖен гамәлгә куючы Динә Гәрәева эстрада мәсьәләсен күтәрде. “Татар милләтен саклау җырлар аша да башкарыла. Минемчә, без Мәдәният министрлыгы каршында бердәм продюссерлык үзәге төзергә тиешбез. Татар җырлары, аның сүзләре буенча күп мөрәҗәгатьләр килә. Продюссерлык үзәген булдыру сыйфатны арттыру өчен кирәк.  Монда яңа исемнәрне ачу, ягъни яңа композиторлар, шагыйрьләр, аранжировщикларны табу күз алдында тотыла”, – диде Гәрәева. 

Президент яшьләргә ярдәм итәргә кирәклеген, әмма аларның иҗатына артык кысылырга да ярамавын ассызыклады. Бу мәсьәләне өйрәнеп, уйлап бетерергә тәкъдим итте. 

Очрашуда шулай ук җырчы Сәйдә Мөхәммәтҗанова, “Татар китабы йорты”ның директоры Айдар Шәйхин, “Юлбасма” китап нәшриятының җитәкчесе Гүзәл Хәсәнова, Камал театры режиссеры Айдар Җаббаров һ.б. катнашты. Алар да үзләрен борчыган сорауларны Рөстәм Нургали улына җиткерделәр. Президент һәркемне диккать белән тыңлады, министрларга шул мәсьәләләр буенча йөкләмәләр бирде, ярдәм итәргә әзер булуларын белдерде.