Тинчурин театрында яңалык: гаилә артистларын җыялар

Театрга нигез салучы драматург, актер, режиссер Кәрим Тинчуринның туган көне дә ул. Көндез мәрхүмнең Архангель зиратындагы каберенә, аннан бюстына чәчәкләр куелачак, кичен исә Н.Исәнбәт туплаган татар дастаны, Туфан Имаметдинов инсценировкасы буенча куелган “Идегәй” спектакле күрсәтеләчәк. 
Театр юбилей елында 2023 елның ахырына кадәр ике премьера әзерләгән.

“Ай, былбылым” спектакле 26 октябрьдә тәкъдим ителә. Аны Шамил Фәһретдинов махсус олы буын артистлары өчен атап язган. Картлар йорты хакындагы моңсу комедияне өлкән буын артистлар тулысынча комедия итәргә ниятли. Декабрьдә исә Мансур Гыйләҗевның “Көлмәгез, мин үләм” комедиясенә тамаша кылачакбыз. 6 ноябрьдә театрның юбилейга концерты көтелә, режиссеры – Камил Гатауллин. 

16 сентябрь көнне театр “Артмиграция” фестивален кабул итә. 24 сенә кадәр күрсәтелгән спектакльләр арасында театр Ркаил Зәйдулланың “Ашина” (режиссеры – Илсур Казакбаев) әсәре белән катнашачак. 

1 октябрьдән алып ай дәвамында Гаилә һәм мәктәп театрларына конкурс игълан итә. Сайлап алынган ике мәктәп һәм бер гаилә театрын сайлап, үз канаты астына алырга теләве – тетарның быелгы сезонда чираттагы яңалыгы.

Моңа өстәп театр бинасы эчке үзгәрешләр кичергән: уңайлы, йомшак, яңа урындыклар куелган, ут җиһазлары яңартылган, һәр тамашачыга җитәрлек күләмдә яңа колакчыннар кайтарылган, 3Д форматында  фотозона булдырылган. 

Фото: http://tinchurinteatr.ru