"Болгарга килгәч, “шок” кичерделәр", яки тарихи мәктәпләрнең бурычы нидә?

Тарихи мәктәп эшчәнлегендә Россиядә укучы йөз чит ил студенты катнашачак. Алар арасында Мәскәү, Санкт-Петербург, Казан вузларының студентлары күп. Шулай ук 5 меңләп студент онлайн-лекцияләр тыңлаячак. Барлыгы 30 илдән катнашырга теләк белдергәннәр.
Тарихи мәктәпнең темасы “Россия һәм Дөнья” дип атала. Мәктәпне оештыручыларның берсе КФУның Халыкара мөнәсәбәтләр институты директоры Рамил Хәйретдинов әйтүенчә, мондый тарихи мәктәпләрнең оештыруның әһәмияте зур. Тарихны бәяләүчеләр, бигрәк тә Россиянең дөнья тарихында урынын төрлечә аңлатучылар бар. Чит илдән килеп укучылар Россия тарихын белүче белгеч-галимнәр, тарихчылар белән турыдан-туры аралашачак. Онлайн-лекцияләр тыңларга, сораулар бирергә, бәхәс-дискуссия, түгәрәк өстәлләрдә аралашырга мөмкин булачак.  
Искә төшерсәк, чит ил студентлары өчен беренче халыкара тарихи мәктәп Болгар шәһәрендә декабрь аенда уздырыла. Анда нәкъ менә Икенче бөтендөнья сугышында  тарихи хәтер, сугыш булган урыннар турында сүз кузгатыла. Бу сугышта кайбер ил тарихларында Россиянең урынын төрлечә бәяләүчеләр бар, шуңа да аңлату эшләре, тарихны өйрәнү темасын күтәрү мөһим була. Чит ил студентлары Болгарга килгәч мәдәни “шок” кичерделәр, ди белгечләр. Студентлар шушы җирлектәге тарихи һәйкәлләр белән дә танышалар, төрле экскурцияләрдә булалар. Проектның беренче этабында барлыгы 20 илдән 1800 студент катнаша. Алга таба җәйге тарихи мәктәп уздыру да планлаштырыла.
Киләчәктә тарих буенча телевизион олимпиадалар уздыру да планлаштырыла. КФУның Тарих фәннәре һәм бөтендөнья мәдәни мирас югары мәктәбе директоры Айрат Ситдыйков әйтүенчә, олимпиадаларда җиңүчеләр вузга кергәндә өстенлеккә ия булачак. Тарихи мәктәп Президент гранты фонды ярдәмендә оештырыла.