Мәктәпләрдә укытучылар җитми, педагог кадрларга кытлык...

– Педагогларның җыелышып, бергә фикер алышуы ил өчен дә мөһим. Педагогик форум уку-укытудагы яңа мөнәсәбәтләрне, яңа үзгәреш-карашларны ачыклый. Алар балалар үсешенә, ата-аналар арасындагы мөнәсәбәтләргә йогынты ясый.  Һәрберсендә педагогның  роле зур. Форум барышында һәрбер төбәк үзен борчыган сорауларны бирми калмас. Бигрәк тә без мәгарифтә тәрбия программаларының мөһимлеген аңлыйбыз. Балаларның җәйге ялларын оештырганда да мөһим ул. Форумны әзерләгәндә бүген әти-әниләр белән эшләүче белгечләр төркемнәрен оештыру турында да сөйләштек.  Элеккегә караганда да моңа игътибар итәргә кирәк. Педагогның авторитеты турында да  форум барышында сөйләшәчәкбез, – диде Татарстанның Премьер-министр урынбасары Ләйлә Фазлыева форум эшчәнлеген ачып.

Форум һәрвакыттагыча зур аудиторияне үзенә җыя. Бүген мәгарифтә борчылырлык мәсьәләләр күп. Белем бирүдә тарихи кыйммәтләрне ачыклау, традицияләрне кайтару да кирәк. КФУ ректоры вазыйфаларын башкаручы Дмитрий Таюрский белдергәнчә, педагогик юнәлештә укучы студентларыбыз өчен дә бүгенге мәктәп әле төп практика базасы булып тора. Татарстанның фән һәм мәгариф министры Илсур Һадиуллин республика Президенты ярдәме белән педагогик белем бирүгә зур игътибар бирелүен ассызыклады.  Быел вузларда 600ләп педагог республика бюджеты  хисабына укый. Кадрларны әзерләү үзәгендә 10 меңләп педагог шөгыльләнә. Педагогларны полингваль-билингваль юнәлештә укыту буенча КФУда да, Алабуга вузларында укулар алып барыла. Республика мәктәпләре педагогик кадрлар белән тәэмин ителә. 
– Бүгенге форумның әһәмияте бик зур. Республикабыз да үзенең тәҗрибәсен дөньяга күрсәтә ала. Тәҗрибәбез дә җитәрлек. Укытучылар хәзерләү буенча төрле юнәлешләр бар. Әлбәттә,  эшлисе эшләр  дә күп. Бездә укытучылар җитми, педагог кадрларга кытлык мәктәпләрдә проблема тудыра. Шуңа күрә яшьләрне шушы һөнәргә күбрәк җәлеп итү, фән белән практиканың бәйләнешен булдыру мөһим. Югары уку йортларын бетергәннән соң, аларны мәктәпләргә кайтару да кирәк. Төпләнеп эшләүләре дә мөһим. Билингваль, полилингваль хәзерлек буенча да бюджеттан акча бүлеп бирелә. Педагогларны хәзерләү төп максат булып тора, – диде ул.

Форум 25-27 май көннәрендә Казан федераль университеты базасында онлайн һәм офлайн форматта эшләячәк.