Мәктәптә кемнәрне бушлай ашаталар?

Күпбалалы балалар мәктәптә бушлай ашарга тиешме? Татарстанның кайбер районнарында гаиләдә 3 бала гына булса, ашату каралмаган дип ишеткән идем. Күп балалы гаилә булып нинди гаилә санала соң? Мәктәптә туклану өлкәсендә закон бозулар булганда кайда мөрәҗәгать итәргә була?

Сания Ермакова, Лаеш.

Россия Президенты карары (№431) нигезендә, күпбалалы гаиләдән булган сабыйларны бушлай ашатырга тиешләр. Татарстанның һәм Россиянең Гаилә кодексы буенча, гаиләдә өч яки аннан күбрәк бала булганда, бу гаилә күпбалалы булып исәпләнә. Дөрес, балаларны ризык белән тәэмин итү муниципалитет җаваплылыгында. Бу мәсьәләдә һәр шәһәр, районның үз таләпләре, кагыйдәләре кертелгән. Әйтик, Казанда кереме яшәү минимумыннан түбән булган гаиләдә яшәүчеләрнең балаларын барысын да бушлай ашаталар.Чаллыда исә биш балалы гаиләләрне ашату гына каралган иде. Бу хакта шикаятьләр булганнан соң, анда үзгәрешләр кертергә җыеналар дип белдерделәр. Мәктәптә балаларның туклануы буенча Татарстанның Мәгариф һәм фән министрлыгына, шулай ук (843) 294-95-44 телефоны аша шикаять белдерергә була.