Шәһәрләр ял итә, авыллар укый

Укучыларны каникулга җибәрер алдыннан куркынычсызлык кагыйдәләре буенча әңгәмәләр, полиция вәкилләре белән очрашулар үткәрелгән. Балаларга хулиганнар һәм җинаятьчеләр корбаны хәленә ничек калмаска кирәклеген өйрәткәннәр, шулай ук нинди гамәлләрнең хокук бозу булуын аңлатканнар. Җанны өшетерлек җинаять очраклары бер-бер артлы теркәлеп торганда, мондый әңгәмәләр үткәрүнең әһәмияте зур.
Казан шәһәре укучылары ялны күңелле һәм файдалы итеп уздырачак. Алар өчен 25-29 март көннәрендә Эчке эшләр министрлыгының мәдәният үзәгендә «Алло, «02», яки Бик куркыныч детектив» дип аталган спектакль куелачак. Ул шулай ук куркынычсызлык кагыйдәләрен саклау турында. Спектакльгә килүчеләр махсус күргәзмәдә төрле корал үрнәкләре белән таныша алачак.
Авыл мәктәпләрендә укучылар каникулга соңрак чыга. Язгы ялларны махсус шулай - авылларда юллар өзелеп, йөреп булмаслык хәлгә килгәч бирәләр. Балаларны инде күбесенчә автобус йөртсә дә, әлеге гадәт сакланып калган.