Укучылар күккә сикерергә җыена: Казанның Совет районында яңа лицей ачылды

Белмәссең: чит планеталар белән элемтә дә урнаштырып куярлар. Татарстан премьер-министры Алексей Песошин 1 сентябрьдә лицейның педагоглар коллективына, укучыларына белем һәм фән дөньясында уңышлар теләде.
– Татарстанда мәгариф челтәрен үстерүгә һәм камилләштерүгә аерым игътибар бирелә. Республикада быел гына да 8 яңа мәктәп ачылды. Совет районындагы бу мәктәп тә яхшы килеп чыккан, шуның өчен төзүчеләргә рәхмәт! Хөрмәтле укытучылар, республиканың киләчәге сезнең кулда, – дип котлады Алексей Песошин.
Заман сулышында җиһазландырылган мәктәп бинасы өчен 187нче лицей директоры Гөлнара Галиева үзенең җавап чыгышында Татарстан Президентына, республика премьер-министрына, Казан шәһәре җитәкчелегенә һәм төзүчеләргә рәхмәт әйтте.
Лицейда белем бирү физика-математика, фән, социаль-гуманитар, лингвистика һәм мәгълүмати-технология юнәлешләрендә алып барыла. IT-мәйдан, астропланетарий җиһазланган. Балалар 1нче сыйныфтан ук 3D-ручка, LEGO-конструкторлар белән шөгыльләнә, дроннар җыя, роботлар белән идарә итә. Бина эченә ике бассейн, зур һәм кече спорт залы урнаштырылган. Тышкы территориядә футбол кыры, баскетбол, волейбол һәм теннис мәйданчыклары төзелгән. Чит телләр һәм татар телен өйрәнү сыйныфлары, логопед бүлмәсе булдырылган.