Күршене нинди очракта психиатрия хастаханәсенә озатырга була?

Күршем бик тиз кызып китүчән. Кайчакта аның психик тайпылыш­лары бар кебек тоела. Кешене психиатрия хастаханәсенә озатыр өчен нишләргә кирәк? Моны үз ризалыгыннан башка эшләп буламы?

Асия Г., Казан.

Татарстан Сәламәтлек саклау министрлыгының штаттан тыш баш белгеч-психиатры Татьяна Гурьянова әйтүенчә, закон нигезендә, үз ризалыгыннан башка бары тик әйләнә-тирәдәгеләргә куркыныч тудырган, агрессив, психик тайпылышлары булган ярдәмгә мохтаҗ кешеләрне генә психиатрия хастаханәсенә озатырга була. Бу очракта да суд, прокурор карары белән генә пациентны дәваларга рөхсәт ителә.