Татарстанда гибрид операция клиникасы ачылды

Гибрид операция бүлеге кардиохирургия буенча операцияләрне күбрәк ясау мөмкинлеген бирә, шулай ук йөрәк авырулы өлкән яшьтәгеләргә тиешле ярдәм күрсәтергә, яшәү озынлыгын арттырырга ярдәм итәчәк. Заманча технологияләр иң катлаулы очракларда югары технологияле медицина ярдәме күрсәтергә булышачак. Гибрид операция бүлеге хирургия, беренче чиратта, йөрәк, кан тамырлары, баш мие белән бәйле операцияләрне ясаганда алыштыргысыз. Гибрид операция бүлмәсендә барлык заманча җиһазлар да бар: УЗИ аппаратлары, МРТ-томограф, ангиограф, рентген... Әлеге җайланмалар хирургия ысулын мөмкин кадәр азрак кулланып, катетер, эндоскопия ярдәмендә иң катлаулы операцияләрне башкарырга ярдәм итә. Шулай ук авыруга төгәл диагноз куярга, вакытында тиешле ярдәм күрсәтергә мөмкинлек бирәчәк.

Әлеге операция бүлеген ачарга, кирәкле җиһазлар белән тәэмин итүдә «Татнефть» компаниясе булышкан, шулай ук Россия Медицина фәннәре академиясе һәм Россия Фәннәр академиясе академигы Ренат Акчурин да фәнни, методик оештыру ягыннан ярдәм күрсәткән. Профессор яңа җиһазларны сынап кичә клиникада ике операция башкарды. Ренат Акчуринның Әлмәткә беренче генә килүе түгел. «Татнефть» акционерлык җәмгыяте һәм Әлмәт шәһәре медицина санитар бүлегендә 2012 елда ук Татарстанның заманча медицина тарихында беренче тапкыр, йөрәккә һәм аортага гибрид операция ясаганнар иде. Ул чакта да операцияне кардиохирург Ренат Акчурин җитәкләгән. Бүген хастаханәдә 40лап гибрид операция башкарылган.

- Гибрид операция бүлмәсен ачу югары технологияле медицина ярдәме күрсәтергә мөмкинлек бирәчәк. Катлаулы авыруларны федераль үзәккә җибәрмичә, үзебездә дәваларга ярдәм итәчәк, - ди, "Татнефть" җәмгыятенең медицина санитар бүлеге баш табибы Мөнир Закирҗанов.

Табибларны, Әлмәт халкын яңа клиника ачылышы белән котларга Россия сәламәтлек саклау министры урынбасары Сергей Краев та килгән иде. Ул Россия сәламәтлек саклау министры Вероника Скворцованың тәбрикләү сүзләрен җиткерде.

"Татнефть" үз бизнесына гына түгел, халык өчен дә күп акчалар сарыф итә. Социаль яктан җаваплылык тойган эшмәкәрлекнең халык турында кайгырту үрнәге бу. Әлеге клиника ачылу яшәү озынлыгын арттырырга, халык өчен тормышны активлаштырырга ярдәм итәчәк, - ди ул.

"Татнефть" акционерлык җәмгыятенең һәм Әлмәт шәһәренең медицина санитар бүлеге республикадагы өч югары технологияле ярдәм күрсәтү үзәгенең берсе булып санала. Ул 750 мең кешегә хезмәт күрсәтә. 2008 елдан клиниканың төп юнәлеше - йөрәк-кан тамырлары авыруларын дәвалау. Табиблар ел саен барлыгы 14 мең операция башкара.