Илшат Әминов: ”Кайбер кандидатларның фантастик чыгышлар ясавына шаккатам”

Сайлау участоклары 8.00 – 20.00 сәгатьләрдә ачык.

– Агитация чоры 22 августтан башланып, 18 сентябрьгә кадәр дәвам итә. Тавыш бирү 3 көн бара, ягъни, дәвамлы көннәр, “тынлык көне” булмый, – диде Татарстанның Үзәк сайлау комиссиясе рәисе Андрей Кондратьев республиканың Үзәк сайлау комиссиясенең “Сайлау ноктасы” мәгълүмат үзәгендә үткәрелгән матбугат конференциясендә.

Дәүләт Думасына партияләрнең федераль исемлегендә депутатлыкка кандидатлар теркәү инде тәмамланган, ә 6 бермандатлы округларда кандидатлар күрсәтү әле дәвам итә. 

– Биектау бермандатлы 50нче округ буенча Татарстан Дәүләт Советына депутат сайлау була. Әлеге округка Биектау белән Әтнә районнары керә. Азат Җиһаншин республиканың экология һәм табигый чыганаклар министры итеп билгеләнү сәбәпле, Дәүләт Советында бер депутат урыны бушады, – диде Андрей Кондратьев.

Татарстанның Журналистлар берлеге рәисе, “Татарстан – Яңа Гасыр” телерадиокомпаниясенең генераль директоры Илшат Әминов матбугат конференциясенең чираттагы кунагы иде.

– Сайлау кампанияләрен яратам мин, җәмгыятьтә җанлылык барлыкка килә. Кешеләр үзләренең күңеленә хуш кандидатны сайлап ала. Әзерлекле кандидатлар килеп чыга тора, алар халыкка кирәкле темаларны беләләр һәм күтәрәләр. Ләкин, кайбер кандидатларның фантастик чыгышлар ясавына шаккатам. Чынга ашмас вәгъдәләр бирергә ярамый. Сайлаулар илнең киләчәген билгели торган мөһим чара. Кешеләр сайлауларга җаваплы карасын иде. Россия Дәүләт Думасына Татарстаннан сайланган депутатлар республика бюджетын тулыландыруга, шулай ук республикага инвестицияләр җәлеп итүдә нык булышлык күрсәтә. Партияләргә агитация чорында үзләренең сүзләрен әйтергә бердәй шартлар тудырылачак. Сайлау көне якынлашкан саен ялган- фейк хәбәрләр таратылу ихтимал. Журналистларның бурычы дөреслекне күрсәтү, фейкларны фаш итү. Блогерлар да мәгълүмат таратуга җаваплы карасын. Мәгълүматны 3 мәртәбә тикшерергә, шуннан соң гына 1 мәртәбә кисәргә кирәк. Бердәм булыйк! – диде Илшат Әминов.