Марат Әхмәтов: «ТАССР төзелү күпмилләтле дәүләт берәмлеген төзүнең уникаль тәҗрибәсе»

Хөрмәтле татарстанлылар! Сезне ихлас күңелдән Татарстан Автономияле Совет Социалистик Республикасы төзелүнең 106 еллыгы белән котлыйм! 

1920 елның 25 июнендә Бөтенроссия Үзәк Башкарма Комитеты яшь автономиядә барлык хакимиятне татар халкының күренекле улы Сәхибгәрәй Сәетгалиев җитәкчелегендәге Вакытлы Революция Комитетына тапшыра. Бу көн безнең республиканың шул ук елның 27 маенда тарихи Декрет белән игълан ителгән яңа дәүләт статусын гамәлгә кертү көне булып санала.

ТАССР төзелү үз заманы өчен алгарыш һәм РСФСР составында күпмилләтле дәүләт берәмлеген төзүнең уникаль тәҗрибәсе була. Аның нигезендә большевиклар доктринасы гына түгел, ә танылган татар революционеры, илнең милли азатлык хәрәкәте лидерларының берсе булган Мирсәет Солтангалиевның кыю идеяләре ята.

Бүген безнең республика – Россия төбәкләренең иң алдынгы, динамик үсештәге төбәкләрнең берсе. Бездә тынычлык һәм татулыкта 175 милләт вәкилләре яши. Без ата-бабаларыбыздан мирас булып калган бердәмлекне саклыйбыз, бай фәнни, сәнәгый һәм мәдәни куәтне арттырабыз, яшьләрне традицион кыйммәтләрдә тәрбиялибез.

Кадерле якташлар! Шушы истәлекле көндә барыгызга да сәламәтлек, тынычлык, иминлек һәм якыннарыгызның күңел җылысын телим. Безнең уртак тарихыбыз алга таба да зирәклек үрнәге, киләсе буыннар өчен саекмас горурлык чыганагы булсын.
Бәйрәм белән, Татарстан!