Владимир Путин: “Илләр икътисади партнерлыкны киңәйтергә, үзара сәүдә һәм инвестицияләрне арттырырга килеште”

Саммит эшендә ассоциациядә катнашучы барлык 11 илнең башлыклары, хөкүмәт җитәкчеләре һәм югары дәрәҗәдәге вәкилләре катнашты. “Саммит кысаларында очрашулар нәтиҗәле узды”, - дип ассызыклады Владимир Путин. Россия Президенты пленар утырыш кысаларында кабул ителгән Казан декларациясенең төп пунктларына тукталды.

Россиянең һәм Көньяк-Көнчыгыш Азия дәүләтләре арасында мөнәсәбәтләр күпьеллык дуслык традицияләренә һәм хезмәттәшлек тәҗрибәсенә нигезләнә. Владимир Путин Россия һәм АСЕАН илләре арасында булган нәтиҗәле хезмәттәшлекне алга таба да үстерергә, ныгытырга кирәк дип белдерде.  Илләр икътисади партнерлыкны киңәйтергә, үзара сәүдә һәм инвестицияләрне арттырырга, шулай ук исәп-хисапны милли валюталарда куллану турында килеште. Россия АСЕАН илләренә медицина, авыл хуҗалыгы продукциясе экспортын арттырырга әзер.

Россия Көньяк-Көнчыгыш Азия илләрен кирәкле азык-төлек һәм энергия чыганаклары белән тәэмин итүне дәвам итәчәк. Илләр арасында туризм өлкәсендә хезмәттәшлекне арттыру да күздә тотыла. Узган ел гына Көньяк-Көнчыгыш илләренә Россиядән туристлар саны 37 процентка арткан. Президент сүзләренчә, АСЕАН илләреннән туристлар да Россиягә ешрак килә башлаган. Сүз уңаеннан, Владимир Путин саммит катнашучыларын Казан Сабан туенда кунак булырга да чакырды.

- Сабан туе - язгы кыр эшләре тәмамлану уңаеннан оештырыла торган милли бәйрәм. Һәркемне бәйрәм белән котлыйсым килә. Саммит катнашучыларының Казанда тоткарланырга мөмкинлеге булса, Сабан туендагы милли уеннар, җырлар беркемне дә битараф калдырмаячак, - диде Россия Президенты Владимир Путин.

Шулай ук саммитта тышкы сәясәт мәсьәләләре турында да сөйләштеләр. Россия һәм АСЕАН илләре АКШ һәм Иран арасында ирешелгән килешүләрне хуплый. Владимир Путин Якын Көнчыгышта һәм Фарсы култыгында вазгыять тотрыклы булыр дип өметләнә. Россия үз чиратында АСЕАН илләре белән киберкуркынычсызлык, терроризмга һәм наркоманиягә каршы көрәштә хезмәттәшлек итәчәк.

Кызыклы яңалыкларны күзәтеп бару өчен безнең МАХ каналына кушылыгыз. 

❮

❯