Хәләл маркет товарларын диния нәзарәтенең «Хәләл» стандарты комитеты тикшергән

Быел ярминкәдә Россиянең 15 төбәгеннән, Әфганстан, Пакистан, Казахстан, Әзәрбайҗан, Кыргызстан, Төркия, Иран, Һиндстан һәм Сенегал кебек илләрдән барлыгы 150 дән артык компания катнаша.

Татарстан мөселманнары диния нәзарәте матбугат үзәге хәбәр иткәнчә, хәләл маркетта сатыла торган барлык товарлар төрле оешмаларда сертификацияләр алган һәм Диния нәзарәтенең “Хәләл” стандарты комитеты тарафыннан өстәмә рәвештә тикшерелгән. Аерым алганда, комитет белгечләре ярминкәдә эшләүче сатучыларның һәм җитештерүчеләрнең чималларын, продукциясен, шулай ук сату-алу шартларын “хәләл” стандартларына туры килү-килмәүне тикшергән.

Комитет сату нокталарында «хәләл» нормативларын кертү буенча эш башкарган. Нәтиҗәдә ярминкә мәйданчыгы комитет күрсәтмәләре буенча тәртипкә китерелгән: хәләл булмаган продукция сатудан алынган, ритуаль чисталыкка ирешү өчен бина һәм җиһазлар җентекләп чистартылган, бәдрәф бүлмәләре төзекләндерелгән һәм таһарәт алырлык итеп җиһазландырылган, хатын-кызлар һәм ир-атлар өчен аерым намаз уку урыннары булдырылган. 

Исегезгә төшерәбез: «Kazan Halal Market» халыкара хәләл-ярминкәсенең рәсми ачылышында Татарстан Рәисе Рөстәм Миңнеханов та катнашты.