Фәридә Яркәева: «Соцпакет урынына акча сайлаучы үзен дә, башкаларны да дарулардан мәхрүм итә»

Бүгенге көндә ташламага ия гражданнарның 58,5 проценты матди компенсациягә өстенлек бирә. Социаль хезмәтләр җыелмасы (соцпакет) программасында катнашу хокукына ия кешеләрнең 90 проценты инвалидлар булуын исәпкә алсаң, бу бик тә сәер күренеш. Нинди дә булса чир буенча исәпкә куелган кешегә даими рәвештә дәвалану, тиешле препаратлар кабул итү кирәк бит, ди ТР сәламәтлек саклау министры урынбасары Фәридә Яркәева. 

6 миллиард сумнан колак кагабыз

Фәридә Яркәева искәртеп узганча, социаль хезмәтләр җыелмасының дару өлешеннән баш тартучылар хәзер аена якынча 1,4 мең сум акчалата компенсация ала, елына бу якынча 16 мең сум дигән сүз. Бу сумма дәвалану бәясе белән чагыштырырлык түгел. Кыйммәтле дәвалану бүген кирәк булмаса да, иртәгә кешенең хәле катлауланып китәргә һәм зур суммада дарулар таләп ителергә мөмкин.

— Акчалата компенсация файдасына препаратлардан баш тартмаса, ташламага ия кешеләрне дарулар белән тәэмин итү өчен Татарстан федераль бюджеттан өстәмә 6 млрд сумга якын акча ала алыр иде. Хәзер республикага программаны гамәлгә ашыруга 2,8 млрд сумга якын акча күчерелә, — дип белдерде Фәридә Яркәева.

Кайда — акча, кайда сәламәтлек мөһим?

Дарулардан баш тартучыларның иң зур өлеше Кукмара районында яшәүчеләр — 64 процент. Шулай ук Тәтеш, Спас, Яшел Үзән һәм Бөгелмә районнарында гомер итүче ташламага ия кешеләр дә акчалата компенсациягә өстенлек бирә. Ә менә Яңа Чишмә, Апас, Югары Ослан, Тукай һәм Теләче районнарында яшәүчеләр үз сәламәтлегенә игътибарлырак.

Биредә күпчелек соцпакетны натураль формада алу яклы. Министр урынбасары сүзләренчә, бу районнарда, социаль пакеттан баш тарту өлеше югары булган территорияләргә караганда, препаратлар белән тәэмин итү проблемалары да шактый азрак. Акчага өстенлек бирүчеләр күбрәк булган саен, программаның финанс тотрыклыгы да югарырак, ди ул.