Татарстанның 18 районында туберкулез буенча вазгыять борчу уята

Мәсәлән, Менделеевск районында авырулар саны уртача күрсәткечтән өч тапкыр артык. Шулай ук Чирмешән, Югары Ослан, Нурлат, Яшел Үзән, Әгерҗе, Азнакай, Арча, Тәтеш, Бөгелмә, Чүпрәле, Түбән Кама, Минзәлә, Биектау, Зәй, Сарман һәм Спас районнарында да авыру күрсәткечләре республика буенча уртача дәрәҗәдән шактый артык, ди Роспотребнадзорның Татарстан буенча идарәсе территорияне санитар саклау бүлеге башлыгы Анна Алешина.
 
Моның сәбәпләре дип әлеге районда авыруны ачыклау буенча актив эш алып баруларын һәм моңа кадәр ачыкланмаган очракларның күп булуын атыйлар. Шул ук вакытта табиблар сүзләренчә, туберкулез белән авыручылар санына түгел, ә авыруның нинди стадиядә ачыклануына игътибар итәргә кирәк. Әлеге районнарда чир, күпчелектә, башлангыч стадиядә ачыклана. Димәк, аны вакытында дәвалап, йогышлы сыйфатка күчүенә киртә куярга мөмкин.
 
Соңгы ун елда Татарстанда туберкулёз ачыклану очраклары икеләтә диярлек кимегән. 2025 елда республикада 654 яңа очрак теркәлгән, бу 100 мең кешегә 16,3 очрак туры килә. Бу узган ел белән чагыштырганда, 17 процентка кимрәк. Бактерия таратучылар дип 292 кеше табылган, ягъни гомуми очракларның 44 проценты.

Балалар арасында да авыру очраклары табылып тора. 2025 елда туберкулез 14 яшькә кадәрге 20 балада табылган, 15-18 яшьлекләр арасында 4 очрак ачыкланган.

Белгечләр ассызыклаганча, туберкулёз йоктыручыларның саллы өлешен эшкә сәләтле яшьтәге кешеләр (18–49 яшь) тәшкил итә. Гомумән алганда, бу чир белән төрле һөнәр ияләре, төрле статустагы кешеләр авырый. Әлеге чирдән беркем дә тулысынча сакланмаган.

Бүген республикада 980 кеше туберкулёз буенча исәптә тора. Аларның 41 проценты тирә-якка инфекция тарата. Мондый кешеләр белән контактта 9 меңнән артык кеше тора. 

 Билгеле булганча, Татарстанда «Сәламәтлек технологиясе» илкүләм проекты гамәлгә ашырыла.