«Җиңү түгел, “Браво! — иң зур бүләк»: Ришат Әхмәдуллин «Тантана» премиясе турында

Шул уңайдан аңа сораулар юлладык.

— Ришат, сәлам! Әлеге номинациядә син сәхнәдәшләрең Эмиль Талипов һәм Искәндәр Хәйруллин белән көч сынашасың. Нинди хисләр кичерәсең?
— Бүгенге көндә андый премияләр булу һәм номинациядә көч сынашу миңа шуны исбатлый: актёрлык һөнәре — ул ярышу түгел. Ә сәхнәдәшләрең белән бер номинациядә булу — зур горурлык! Һәр актёр җиңү өчен эшли дип уйламыйм. Асылда ул тамашачыны үз эше белән җәлеп итә алса һәм ахырда «Браво!» алса — менә шул иң зур, иң рәхәт хисләр!

— Дөрес хәтерләсәм, «Тантана»да моңа кадәр номинациядә булганың юк иде бугай. Театрда ничә ел эшләп, баш рольләр уйнасаң да, ничек эләкми калдың икән? Бу турыда уйлаганың бармы?
— Чыннан да шулай. Мин, Аллаһка шөкер, инде 15 ел театрда яраткан эшем белән шөгыльләнәм һәм андый номинацияләргә эләгү турында уйламый идем. Асылда син номинациягә эләгер өчен эшләмисең бит. Күрәсең, язмыш моны нәкъ менә хәзер хәл иткән. «Вакыт җитте, Ришат!» — дигәндер, һәм менә мин бу номинациядә. Иң мөһиме — бу иртәрәк тә, соңрак та түгел, ә нәкъ вакытында булды. Барысы да Аллаһтан.

— Инде күп еллар сәхнәдә булсаң да, тормышта син бик гади һәм тыйнак кеше. «Йолдызлык чире» йокмасын өчен нәрсә ярдәм итә?
— Мине яхшы белгән кешеләргә мин гади, тыйнак, хәтта бераз оялчан да. Ә белмәгәннәргә кайчак усал яки тәкәббер булып күренергә мөмкин. Шуңа күрә, бөекләр әйткәнчә, матурлык караучының күзләрендә. Кеше эчтән ни белән тулы булса, дөньяны да шулай күрә һәм кабул итә.

Таңсылу Мостафина

Билгеле булганча, Татарстанда «Кадрлар» илкүләм проекты гамәлгә ашырыла.