Артистларыбыз кайсы театр вә спектакльләрне үз итә?

Иҗат сөючеләрне тәбрик итәбез һәм бәйрәм уңаеннан сораштыру оештырып алабыз. Артистлар театрларга еш йөриме? Иң яраткан спектакльләре нинди? Кыскасы, барлык сорауларга да җавап таптык, барысы да әлеге язмада. 

Гөлназ Яхина укыган вакытта театрларга еш йөргән һәм “Зәңгәр шәл” спектаклен яратып караган. “Соңгы арада бик ошатып караган спектаклем – ул “Сөяркә”. Төп рольдәге актер – Искәндәр Хәйруллин уйнавына  шаккатып карап, шул спектакльгә гашыйк булып кайттым”,– дип бүлешә җырчы. 

Бик беләсегез килсә, Илсур Шәрипҗанов театр көллиятен кызыл дипломга тәмамлаган һәм Казан театрлары аны хәтта артист буларак үзләренә эшкә дә чакырган, әмма гаилә башлыгы тормышын җыр белән бәйләп җибәрергә карар кыла. “Беренче тапкыр әкият курчак театрының спектаклен тамаша кылдым, мәктәпкә килгәннәр иде. Хәзерге вакытта теге яки бу спектакль ошый дип аерып әйтә алмыйм. Яшь режиссерларыбыз куйган сәхнә әсәрләрен карарга бик яратам. Айдар Җәббаров һәм Илгиз Зәйниевның спектакльләре искиткеч”,– дип искәртә театрга барып, рухи азык алып, ял итеп, хәтта шул сәхнә әсәре аркасында бер атна буе уйга батып йөрергә яратучы Илсур. 

Кызганыч, әмма Алсу Абульханова театрларга сирәк йөри. Аңа карамастан, җырчының нәкъ менә шушы өлкә белән бйәле горурлыгы бар. “Айдар Җәббаров Г.Камал театрында эшләгән чагында “Ситса туй” спектакленә вокал куючы буларак чакырды, актерлар белән җәй буе җырлар өйрәндек, эстрада стилендә чыгыш ясауны шомарттык. Мине исә премьераның беренче көннәрендә сәхнәгә дә чыгардылар, рәхмәтләр әйттеләр. Әлеге спектакльгә үз өлешемне кертә алуыма мин бик шат”,– дип бүлешә Алсу. 

“Әле күптән түгел генә аңладым: минем бу арада беркая да барганым, кеше янына чыкканым юк икән бит. Шуңа күрә яңа спектакльләрне тизрәк карарга, тиз арада театрга барырга ашыгам. Рухи азыкка бик сусадым”, - ди Лилия Хәйруллина. Сүз уңаеннан, җырчы үзенең беренче караган спектаклен хәтерләми, әмма театр белән бәйле кызыклырак хатирәсе бар аның. “Кечкенә вакытта иске Г.Камал театры бинасында адашып йөргәнем булды. Әниләрнең съемка иде, мин елап беттем, шунда бер апа мине каридордан табып алып, әниләргә тапшырган иде”,– дип көлә ул. 

Раяз Фасыйхов спектакльләр карарга бик ярата, премьераларны калдырмый, үзе дә яшь чагында авылның үзешчән халык театрында катнаша торган булган. “Актерлар белән дә дус мин, аларны бик хөрмәт итәм”,– ди ул. Классик спектакльләрне үз итә булып чыкты Раяз. “Әлдермештән Әлмәндәр”, “Телсез күке”, яңалары арасыннан “Ситса туй”, “Өйләнәм. Тат”ны карарга яратам. Айдар Җәббаровның К.Тинчурин театрына килүе дә бик яхшы булды. Илгиз Зәйниев белән икесе татарның иң уңган-булган режиссерлары, горурланам”,– дип өнди җырчы.