Блогер Мәрсилә Искәндәрова: «Балам минсез өйгә кайтып китте…»

“Мул тормышта үстерсәләр дә, һәр теләгән әйберне алып бирмәделәр”

- Мәрсилә, блогыңны ничә ел алып барасың инде?
 -Бер ун еллап бардыр. Беренче курста укыганда мәҗлесләр алып бара башлаган идем. Шул вакытларда мин блогымны да ачтым.

- Кеше синең блогыңны ник күзәтеп бара микән?
- Мин бит тормышымны ничек бар, шулай төшерәм. Матур картина гына күрсәтмим. Кайчагында, әйтик, аш-су бүлмәсендә идеаль чисталык булмаса да, мин аны барыбер төшерәм һәм кертәм. Без бит беребез дә идеаль тормышта яшәмибез. Һәрберебезнең төрле чаклары була: өй дә гел чиста булып тормый, кәефебез дә күтәренке түгел, балалар да авырып тора. Өстәвенә балаларым әле бәләкәй. Аларның да төнлә йокламаган чаклары булгалый. Мин йокы күрмәгән күзләр белән дә видеога төшә алам. Махсус ясанып, бизәнеп утырмыйм. Ә мине караучылар шушы гадилегемне кабул итә.

- Гаиләңне дә күзәтәләрдер?
- Әйе, ирем Илфир Искәндәров җырчы һәм композитор бит инде. Шулай ук әниемне, абыемны да карарга яраталар. Әнием үзе дә хәзер блог алып бара. Яшермим, әниләр акча ягыннан хәлле кешеләр, ләкин алар беркемнән дә аерылмыйлар. Әниемне шушы беркемне дә аермавы өчен карыйлардыр дип уйлыйм. 

- Син, әйтик, мәктәптә укыганда барыбер гел акчада үсмәгәнсеңдер?
- Дөресен әйткәндә, мин акчасыз чагымны хәтерләмим. Абыем һәм апамның балачакларына, бәлки, эләккәндер ул вакытлар. Шулай да, ничек кенә булмасын, мин башкалардан беркайчан да аерылмадым. Без мәктәптә укыганда, чын бәбигә охшаган курчак чыккан иде. Аны киендереп тә була иде. Сыйныфташларымның берничәсендә бар иде ул курчак. Кызыга идем шуңа. Миңа аны бирделәр бирүен, ләкин соңыннан гына. Велосипед белән дә шулай ук булды. Мул тормышта үстерсәләр дә, барысын да рөхсәт итеп, һәр теләгән әйберне алып бирмәделәр. 

– Ялгышмасам, хәзер сез гаиләгез белән йөргән машинаны да әниләрегез алып биргән иде. Моңа ирең ничек карый?
- Әйе, машинаны алар безгә бүләк иттеләр. Без бит мәҗлесләр алып барабыз, шуңа күрә аппаратура ташыр өчен зур машина кирәк. Илфир әтиләргә рәхмәтле инде. Нишләтәсең, кулларыннан килгәч, ярдәм итәләр.

- Ник баерак егеткә кияүгә чыкмадың? Апаң менә эшләми, Мәскәүдә яши...
- Беләсеңме, миңа әниләремнең беркайчан да бай егеткә генә кияүгә чык, дигәннәре булмады. Әйе, Миләүшә апамның ире, ягъни безнең җизни яхшы эштә эшли, акчасын алып кайта. Апама ул яктан бәхет елмайган инде, ул өйдә генә утыра, балаларын тәрбияли. Әмма аның да бай егеткә кияүгә чыгам, дигән максаты юк иде. Язмыш эше генә бу. Минем очракта да шулай, мин Илфирга гашыйк булдым, һәм аның, әйтик, нинди машина йөрүе минем өчен мөһим түгел иде.

- Гашыйк булу ничек соң ул?
-Без бит туйда таныштык. Мин кунак идем, ә ул баянчы булып килгән иде. Озын буйлы, чибәр, өстәвенә баянда уйный, җырлый...Безнең өстәлдә утырган бөтен кызлар кызыкты аңа. Мин аны үземә мәңге карамас дип уйлый идем. Дөресен әйтсәм, яшьрәк чакта үземнең кадеремне белеп бетермәгәнмен инде мин. Комплексларым күп иде: имеш, тазарак, бик чибәр дә түгел. Илфир туйдан соң икенче көнне миңа язгач, аптырап калган идем. 

- Илфир нинди машинада йөри иде соң сез танышканда?
- Ул безнең ил машинасында йөри иде. “Девятка” машинасы иде, ялгышмасам. Үзем исә чит ил машинасында йөри идем. Әмма мин моңа бер дә игътибар бирмәдем. Без өйләнешкәч, Мамадышта беренче тапкыр бәрәңгене көрәк белән казып алган идем. Ә бездә бакча белән бәйле эшләрне трактор эшли иде. Анда бәдрәф һәм мунча урамда. Әмма мин бу шартларга бер дә игътибар итмәдем. Мамадышка кайткач, миңа рәхәт, икенче өемдә кебек.

- Илфир, синең баерак гаиләдән булуыңны белгәч, аралашудан туктамадымы соң?
-Бер елга югалды ул. Миңа бай егет кирәк дип уйлаган икән. Аралашмый торгач, ул бер шалтыратты, шул ук мизгелдә алдым. Хәзер менә уйлыйм: шунда бераз булса да тилмертеп аласы булган икән. Беркатлы булгач, аның язуыннан һәм шалтыратуыннан күкнең җиденче катына ук менеп китә идем.
“Бала имәме, дип йөрәгемне телгәләп бетергәннәр иде”

- Ике малай үстерәсез. Кабат әни булырга теләр идеңме?
-Белмим... Дөресен әйтсәм, кабат тазарудан да куркам инде. Бала табу хатын-кызның тормышына төрле үзгәрешләр кертә бит ул. Әле менә ябыктыра торган операция ясаттым. 28 килограммга ябыктым. Үземне шундый яратам хәзер!

- Ничә сумга төште бу операция? Кем түләде?
-350 мең булды. Әниләр булышты, алар түләде. Илфир операция ясатуыма риза түгел иде. Аңа ябыгып беткән, скелетка калган хатын кирәкми. Шулай да мин тәвәкәлләдем. Һәм, әлбәттә, Илфирның миңа өч йөз мең акча бирә алмаячагын да аңлый идем. Шуңа күрә әниләргә мөрәҗәгать иттем. Әгәр дә алар акча бирмәсә, бәлки кредит алган булыр идем. 

- Ник ясаттың, дип сүгүчеләр булдымы?
- Һәркем үз гәүдәсе өчен үзе җаваплы. Бу минем карар иде, шуңа күрә кеше сүзенә игътибар да итмим.

- Тазарак чакта яратмадыңмы үзеңне?..
- Баламны тапкач, тизрәк өйгә кайтырга да ябыгырга иде дип уйлап йөрдем. Ә барысы да, гомумән, башкача булды... Беләсеңме, икенче тапкыр әни булгач кына, иң мөһиме – сәламәтлек икәнен аңладым. Бу сүзләрнең асылына чынлап төшендем.

- Ялгышмасам, улың өйгә кайтса да, син хастаханәдә ятып калдың. Ни булды, сөйләче.
- Уух, ул реанимациядә ни генә күрмәдем мин. Улым үпкә ялкынсынуы белән туды. Кечкенә улым Эмиль ике атна реанимациядә ятты. Көн саен аның янына йөри идем. Аннан соң тагын ике атна патология белән туган балалар бүлегендә икәү бергә яттык. Инде чыгаралар, дигәндә генә, тән температурам кырыкка менде. Тикшерделәр, карадылар – бернәрсә тапмадылар. Күрәсең, стресс кичерүем шундый нәтиҗәгә китергәннәрдер. Бәләкәчем минсез өйгә кайтып китте, ә мин тагын ун көнгә хастаханәдә калдым. 

- Син хастаханәдә ятканда, сабыйны кем карады?
- Әнием килде. Мең рәхмәт! Бу тормышта сыенырлык кешем бар икән, Аллаһка шөкер. Әле дә ул бар. Үзем әни булсам да, миңа да әни кирәк. Аллаһ әти белән әниләргә мөмкин кадәр озык озак гомерләр насыйп итсен иде. Хастаханәдә үткәргән көннәрем дәвамында шушы вакытка кадәр бер кыенлык күрми яшәгәнемне аңладым. Әле ул чакларда да зарланырга сәбәп таба идем. Бар булганның кадерен белеп яшәргә кирәк икән.

- Бала тапкач, нинди проблемалар белән “очраштың”? Әни булуның кайсы ягы син уйлаганча булмады?
- Мин, әлбәттә, Аллаһка миңа ике егет бүләк иткәне өчен рәхмәтле генә. Әмма улларымның икесе белән дә сөтем булмады. Беренче улымны тугач, ник имезмисең, бала имәме, дип йөрәгемне телгәләп бетергәннәр иде. Барысы да имезә, ә минеке имми... Әле үзең таптыңмы, дип сорыйлар. Минемчә, кесарев кисеме белән табуның бер ояты юк. Иң мөһиме – сәламәт бала табу. 

- Сөтең юк бит, дип әйткәч, үзеңне башкалардан ким кебек тоясың, әйеме?
-Нәкъ шулай, Алинә. Беренче тапкыр әни булганнарны гаепләмәсеннәр иде. Киресенчә, әле әни булырга өйрәнеп килүче хатын-кызга ярдәм итәргә, аны гел мактап торырга кирәк. Сөте юк икән, димәк, организмы шулай яратылган. Бу кимчелек түгел. Бала елый икән, әни кешене гаепләргә ашыкмагыз. Ул өйрәнә, берәү дә гений булып тумый.

- Кесарев кисеме белән тапкач, күңелең төштеме?
-Беренчесен тапканда, еладым, әйе. Амбицияләр, дигән әйбер бар бит. Бөтенесе үзе таба, димәк, миңа да шулай кирәк. Буш сүзләр – бу. Менә хәзер генә аңлыйм: өлкән улым белән өч көннән соң өйгә кайтуым зур бәхет булган. Минем кебек яңа туган сабыен куеныннан аерган хатын-кыз гына мине аңлар.   
“Илфир миңа хыянәт итә алмыйдыр ул”

- Илфир ир буларак нинди?
-Ул матур сүзгә саран. Үзенең яхшы ир һәм әти булуын ул гамәлләре аша күрсәтә. Мин авырып китсәм, балаларны карый, мине кайгыртып тора. Кечкенә улым минсез өйгә кайткач, шулай ук караган. Мине бар да яхшы булачак, дип тынычландырып торды. 

- Аңа кызлар язамы?
- Тикшергәнем дә, күргәнем дә юк. Илфир миңа хыянәт итә алмыйдыр ул. Бәлки, мин ал күзлекләр аша карыймдыр. Шулай да мин аңа ышанам. Аллаһ күрсәтмәсен.

- Сорыйм әле: әле миңа сөйләгән кечкенә улың белән сөйләгән тарихны син интернетта “чәчмәдең”. Ник?
- Мин “хайп” артыннан кумыйм. Әлбәттә, бала табу йортында елаганнарымны, хастаханәдә тилмергәннәремне төшерсәм, блогыма язылучылар саны бермә-бер артыр иде. Әмма мин махсус “кычкырып торган” язулар язып, елап видеолар төшермим. Ул вакытта мин интернет киңлекләреннән югалып тордым. Миңа бик күп яздылар, бөтен кешегә дә кызык бит. Әллә кемнәр аша хәлемне белергә дә тырышканнар икән. 

- Хастаханәдә сине таныйлар идеме соң?
- Әйе, берничә тапкыр таныдылар, эндәштеләр. Мәрсилә, берәр нәрсә булмагандыр бит, диделәр берсендә. Елый-елый, реанимация коридорын болай гына таптыйм бит, әйе... Кайбер кеше уйламыйча сүз сөйли. Мин язучылар саны артыннан кумыйм. Әгәр дә бу күрсәткеч миңа мөһим булса, бәлки, башка төрлеләр стильдә алып барыр идем блогымны. Хайп, дип тормыштагы, гаиләдәге бөтен нечкәлекләрне чәчү миңа килешми. 

Билгеле булганча, Татарстанда «Гаилә» илкүләм проекты гамәлгә ашырыла.