Эльвира Хамматова: "Әти"турындагы җырымны бөтен кеше дә елый-елый тыңлыйбыз, диләр".

Әйтерсең лә, җырчы гашыйк булган. Хәер, яңалыклары турында үзеннән сорашыйк әле.

- Эльвира, тормышыңда булган 3 төп яңалык турында сорасалар, ни дип җавап кайтарыр идең?

- Беренчедән, фатирымны саттым, яңасын алырга җыенам, Алла теләсә. Икенчедән, яңа җыр җыентыгым чыкты һәм, өченчедән, мин эшкә урнаштым.

- Кем булып эшлисең?

- Минем өчен яңа өлкә, әлегә сөйләмим. Иртәнге сәгать 8.30дан кичке сәгать 17.30га кадәр биш көн эшлим.

- Кияүгә чыкмадыңмы? Юкка гына сорамыйм, имеш-мимешләр йөри...

- Чыккан булсам, яшереп кала алмаган булыр идем.

- Эльвира, син шундый үзгәрдең. Тамашачыга яңа яктан ачылдың...

- Монда яңа җыентыгымның өлеше зур. Бик күп эзләнүләр, уйланулар аша күңел түрендә соңгы елларда әйтеп, аңлатып булмаган хис-кичерешләрне ачып салган җыентык бу. Син әйткән яңа образны да тамашачылар якынрак күрә, чөнки мин ачылдым.

- Бирегә барлыгы ничә җыр тупланган?

- Җыентыкка барлыгы 9 җыр керде. Мин бу җырларны "иҗаттан киттегез, яңа җырларыгыз күренми" кызыксынучылар булганга күрә, чыгарырга булдым. Кайберләре моннан бер-ике ел элек үк язылган иде, аларны яңартып янәдән яздырдык.

- Җыентыкта әтиең турында үзәк өзгеч җыр бар...

- Әйе, бу җыр бик күп фикерләр уятты. Бөтен кеше дә елый-елый тыңлыйбыз, ди. Әтине югалтканнан соң, аның турында Рөстәм абыйга сөйләдем һәм ул шушы шигырьне язып бирде. Ильмира Нәгыймова бик матур көй иҗат итте.

- "Сиңа" җыры кемгә багышлана?

- Үткән тормышыма бәйле. Бу җыр 70 процент хатын-кызның үткәне, кичергәне һәм бүгенгесенә бәйле булып чыкты. "Сиңа"ны каз тәннәре чыкмыйча тыңлап булмый, елый-елый шешенеп беттек, дип язалар. Мондый хис-кичерешләр уята алганмын икән, җырчы буларак, бу минем өчен бик зур дәрәҗә. Тиздән "Сиңа" җырына клип төшерергә җыенам.

ЭЛЬВИРА ШАКИРОВА