Фирдүс Тямаев: «Яңа хәйрия проектын башлап җибәрәм»

Фирдүс җыр бәйрәмен тәмамлагач та, хис-кичерешләре белән уртаклашты: “Әлбәттә, безнең татар милләтендә мондый премияләр булгач, күңелле. Тамашачылардан бу кадәр алкышлар көтмәгән идем. Оештыручыларга бик зур рәхмәт. Еллар үтә, яшь бара, шуңа күрә премиягә сагындырып килү, бәлки, дөрестер. Һәркемгә зур рәхмәт. Бу бүләкләр минеке түгел, ә безнеке”, - диде ул.

- Фирдүс, образыгызны үзгәрттегез. Бу хайп өченме?

- Мин хайп өчен эшли торган артист түгел. Беркайчан шаккаттыру артыннан йөрмәдем. 15 ел сәхнәдә һәм шул дәвердә бер тапкыр гына хайпка эләктем. Гүзәл Уразова белән юлда булган хәл. Анысын да без махсус уйлап чыгармадык. Яхшылап уйламыйча эшләнгән әйбер, анысында килешәм. Болай тормышта шаяртырга яратам. Мин чәчне алдырсам да, ничек кенә кылансам да, тамашачы мине бөтенләй бетереп атмый: анысы сөендерә. Димәк, мине шулай кабул итәләр, яраталар. Чәчне алдыргач: “Яшәреп киткәнсең, элеккеге Фирдүс кайтты”, - дип яздылар. Барыбер бертөрле образ туйдырган иде. Менә чәчне алдыргач, шундый рәхәт икән бит. Озынрак чәчне сәхнәгә чыкканчы рәвешен китереп бетерергә кирәк. Ә монысын тарап куйдың да, бетте. Вакытка да, бюджетка да экономия.

- Яңа елга яңа проект тәкъдим итәсез икән...

- Киләсе Яңа еллар белән котлыйсым килә. Яңа хәйрия проектын башлап җибәрәм. Махсус хәрби операциядә хезмәт итүче егетләрнең балаларын чакырып, бер бәйрәм оештырасым килә. Кыш бабай, Кар кызы да булачак. Шушы программа белән Әлки, Аксубай, Балык Бистәсе, Нурлат районнарына барам. Безнең егетләр бу вакытта да илебезнең сагында тора. Хәлдән килгәнчә аларның балаларын чакырып, кәефләрен күтәрәсем килә. Ярдәм итүчеләр дә бар, шөкер. Аларга да бик зур рәхмәт. Нурлат концертының афишасын инде куйдым. Ә калган өч районның афишаларын тиздән урнаштырачакбыз. Бер көн эчендә өч районга барачакбыз. Балык бистәсе - Әлки - Аксубай, маршрут шундыйрак. Бу проектны гамәлгә ашыра алсак, Татарстанның бөтен районнарын да шулай йөреп чыгасым килә. Барысына да исәнлек кирәк. Сәламәтлек тә какшап ала бит, кайвакыт. Дөрес, балалар алдында ничек чыгыш ясармын икән дип хәзер үк кайгыра башладым.

- Яңа программагызның афишалары күренә башлады. “Тишек носки”га алмашка нинди программа әзерлисез?

- Яңа программаның исеме “Юләр бүре”. Бу исемдә дә бик күп мәгънә ята. Без концертта рәхәтләнеп биеп, юләрләнеп алабыз бит. Сикереп-сикереп биегәннән соң, тамашачыны утыртам да, тәрбияви сүзләр, үз фикерләремне җиткерәсем килә.