Фирүзә Ибәтуллина: "Апам өчен дога кылучылар күп"

Чарада мәрхүмәнең ире Габделхәй Биктаһиров, кызы Алсу, сеңлесе Фирүзә Ибәтуллина, Башкортстанның Тәтешле районы башлыгы Фәнүр Шәйхисламов, Башкортстанның мәдәният министры урынбасары Гөлдар Хәмитова, эстраданың танылган артистлары Айдар Галимов, Фән Вәлиәхмәтов, Лилия Муллагалиева һәм башкалар бар иде. 

“Ерак араларны якын итеп кайткан райондашларга, артистларга, Хәния апамның гаиләсе – җизнәм белән Алсуыма рәхмәт. Хәния апам күкләрдән күреп торадыр, мин ихлас күңелдән яратып аны туган көне белән котлыйм. Без Кояшым белән иртәнге сәгать биштән туган көн белән котлаша идек. Хәния апам Аллаһының рәхмәтендә, оҗмахның түрләрендә булсын. Кем белән генә сөйләшсәм дә, аның өчен дога кылучылар күп, барысына да зур рәхмәт”, – ди Фирүзә Ибәтуллина.

Габделхәй Биктаһиров Хәния Фәрхинең һәйкәлдәге образына охшаш күлмәкне Фирүзә ханымга тапшырды. “Ул монда булырга тиеш”, - диде ул.

Шул ук көнне Хәния Фәрхи исемендәге “Онытылыр димә” беренче Халыкара фестиваль-конкурс булды. Конкурска Россиянең төрле төбәкләреннән 123ләп гариза кабул ителгән. “Катнашучылар ике төркемгә бүленде: профессионаллар һәм үзешчәннәр. Алар Хәния апамның репертуарындагы җырларны башкарды. Жюри рәисе Айдар Галимов иде. Җиңүчеләргә дипломнар һәм истәлекле бүләкләр тапшырылды”, - диде Фирүзә Ибәтуллина.

Шуны да әйтергә кирәк, Тәтешле район үзәгендә Хәния Фәрхи истәлегенә музей ачылды. Анда җырчының аудио-видео кассеталары, күп еллар иҗат юлында куйган хезмәте өчен дипломнары, мактау һәм рәхмәт хатлары, зәвыклы киемнәре, аның белән бәйле булган һәр төрле истәлекләр урын алган.