Гөлназ Асаева: “Ильмирага нәрсә булган соң әле?”

Социаль челтәрдә: “Ильмира сине бозып бетерә”, - дигән сүзләр очрый. Гөлназ Асаева белән Ильмира Нәгыймованың уртак җыры да бар. Гөлназ Асаева белән Ильмира Нәгыймованы нәрсә бәйли? Бу сорауны җырчының үзенә бирдек.

– “Ильмира белән йөрсәң, бозыласың”, – дигән рухта булган комментарийларны укырга бик читен. Ильмирага нәрсә булган соң әле? Менә дигән тормыш көтә, ике баласын үстерә, искитмәле итеп концертлар куя. Ул бик тырыш хатын-кыз. Без Ильмира белән узаган ел бик тыгыз аралаша башладык. Ул бик ачык күңелле, ачык, ярдәмчел кеше. Авыр вакытта ярдәм итәрдәй сүзен дә таба белә. Бәлки, социаль челтәрләрдә бер төрле күренәдер. Әмма тормышта ул, гомумән, башка кеше. Аның кебек нечкә күңеллеләрне эстрадада күргәнем юк. Татар эстрадасында хатын-кызлар арасында төпле үз урынын алган җырчы дип уйлыйм.