Гүзәл Авзалова вафат: Әлфия Авзованың олы кызына 70 яшь тулган булган

Гүзәл Авзалова озак вакыт яман шеш белән көрәшкән. Соңгы ике атнасында аның хәле аеруча авыр булган. Якыннары соңгы көннәренә кадәр янында булып, аны саклап калган.

«19 майда 70 яшен тутырып, яман шештән китеп барды»

Гүзәлнең бертуганы Зөлфия ханым сүзләренчә, аның сеңлесе үпкәләрендәге яман шеш аркасында вафат булган. Авыруның баш миенә дә таралуы ачыкланган.

«Гүзәл бертуганым авырды шул. 19 майда 70 яшен тутырып, яман шештән китеп барды, җаныкаем. Соңгы ике атнасын бик интекте. Үпкәләрендә иде, тамырлары баш миенә үк киткән булып чыкты», — дип сөйләде Зөлфия ханым.

Ул сеңлесенең соңгы көннәрендә һәрвакыт янында булуын әйтте.

«Мин һәрвакыт янында булдым, көн саен янына килеп, иртәдән кичкә кадәр янәшәсендә идем. Тәүлегенә ике генә сәгать йокладым ул көннәрдә. Без бик тырыштык», — диде ул.

«Безне иң авыр карарны кабул итәргә мәҗбүр итте»

Гүзәлнең хәле начарайгач, якыннары авыр карар алдында калган.

«Соңгы көннәрдә „катетер“ термины безне иң авыр карарны кабул итәргә мәҗбүр итте. Үзебез генә эш итә алмадык, урнаштыра белмәдек без аны. Әгәр дә реанимациягә салсак, анда аңа авырырак булачак диделәр. Шуңа да хосписка урнаштырдык», — дип искә алды Зөлфия ханым.

Аның сүзләренчә, хосписта Гүзәлне бик яхшы тәрбияләгәннәр. Кызы Гүзәл дә, Зөлфия ханым да соңгы көннәренә кадәр аның янында булган.

«Аны анда бик тәрбияләделәр, кызы Гүзәл дә, мин дә гел янында идек. Мин аны шундый сагынам... Урыны оҗмахларда булсын. Ул минем әнием урынына калган кешем иде», — диде Зөлфия ханым.

Гүзәл Авзалованың туганнарының тирән кайгысын уртаклашабыз. Мәрхүмәнең урыны җәннәттә, авыр туфрагы җиңел, рухы шат булсын.