Яңа ел корпоративлары: кайсы җырчы күпмегә җырлый?

Рөстәм Хәсәнов, алып баручы сыйфатында чыгыш ясаучы буларак, төгәл генә бәя әйтә алмады. Бәлки әйтергә теләмәгәндер дә. 
– Хак дигәне юлның ераклыгына да карый бит әле. Әйтик, Башкортстаннан Буага кадәр барырга туры килә икән, юл чыгымнарын да кушмыйча булмый. 15 декабрьдән 30ына кадәр көннәр тулы, артык бер заказ да ала алмыйм. Ә менә Яңа елны гаилә белән өйдә каршыларга исәп. 31 декабрь белән 1 гыйнварны өйдә булам да, 2 гыйнвар көнне кабаттан гастрольгә. Ә Яңа ел корпоративында чыгышым 15 мең сумнан башлана, төгәл хак түгел, мине бик күрәсе килүчеләргә 50 мең сумга да төшәргә мөмкинмен. Ләкин шунысы тәгаен, бер көнне бер мәҗлестә генә чыгыш ясаячакмын, сикереп йөрергә теләмим, алай сыйфаты аксый. 

Ринат Рахматуллин:
– Тагын өч көнебез буш, болай заказларны күп алдык. Бер көндә ике-өч җирдә чыгыш ясау мөмкинлеге дә бар, без бит инде җырны җырлыйбыз да, аннары кирәгебез калмый, икенче мәҗлескә барып та кеше күңелен күрә алабыз. Чыгышларның бәяләре төрле, якынча 100 мең сум тирәсе. Яңа елны гаилә белән Сабада каршы алырга уйлап торабыз. Гаиләбез, шөкер, ишле, Динараның әбисе белән бабасы да исән, алар исән чакта бергәлекнең кадерен белеп яшәргә кирәк.