Иделия: "АКШта коронавирусның икенче дулкыны башланды..."

- Иделия, Майамида коронавирус бармы?
- Вирусның икенче дулкыны башланды. Кибетләргә бары тик битлек белән генә кертәләр. Сездәге кебек. Шулай да халык әкренләп гадәти тормышка кайта башлады. Пляжлар ачылды.

- Ниләр белән шөгыльләнәсең? Яңа һөнәрле булгансың икән?
- Күчемсез милек буенча агент һөнәрен үзләштердем. Россиягә барып кайткач, яңа һөнәрем белән ныклап шөгыльләнергә исәп. Тулы метражлы фильм-триллерга сценарий язуны төгәлләдем.

- Фильм нәрсә турында? Нинди телдә яздың?
- Инглиз телендә яздым. Ярты елга якын язылды ул. “Вehind the door” - псилохогик триллер дияр идем. Сценарий искиткеч. Инвесторлар табып, төшерәсе генә калды. Рус теленә тәрҗемә итү теләге дә бар. Кем белә, бәлки төшерергә телүчеләр табылыр? Россиядә дә хәзер талантлы яшьләр күп.

- Шәхси тормышыңны һәрвакыт яшерәсең. Син кияүдәме?
- Әйе, кияүдә. Гаиләм турында сөйләргә яратмыйм. Нигә кирәк ул?..

- Җирле ризыклар ашыйсыңмы? Ничек тукланасың?
- Рестораннарга еш йөрмибез, ризыкны өйдә пешерәбез. Мин дөрес туклану яклы. Спорт белән шөгыльләнәм.

- Татар ашларын сагынасыңмы?
- Әлбәттә, сагынам. Шуңа күрә елына ике тапкыр татар бәлешләрен, өчпочмакларын ашарга Россиягә кайтам. Дөрес, татар ашлары бик үк файдалы түгел. Әмма сирәк-мирәк ашарга була.

- Казанга кайчан кайтасың, Иделия?
- Июльдә кайтырга планлаштырам, Алла теләсә. Елына - ике, ә кайвакыт өч тапкыр да кайтам. Кайтмый калмаган елым юк.

Лена Рәхимова