#Шоу-бизнес 09 февраль 2016, 11:18

Илсөя Бәдретдиновага беркем дә фатир бүләк итмәгән, ә юбилеен үзе истә калырлык итеп үткәргән (ФОТОЛАР)

09 февраль 2016, 11:18

Татар эстрадасының үзенчәлекле җырчысы Илсөя Бәдретдинова Казанда өч бүлмәле фатир алган. Әмма ниндидер имеш-мимешләр буенча, аңа бу фатирны беркем дә бүләк итмәгән. Илсөя аны ипотекага алган, өстәвенә фатирга акча кертү өчен ел ярым элек кенә алган Chevrolet Orlando машинасын да саткан.

Скопировать ссылку

Илсөя Бәдретдиновага беркем дә фатир бүләк итмәгән, ә юбилеен үзе истә калырлык итеп үткәргән (ФОТОЛАР)

– Гомере буе машина йөртү турында хыялланып үскән кыз өчен машинаны сату бик авыр булды. Елый-елый аерылдым, ләкин фатир, машинага караганда, мөһимрәк. Анда улым Нариман белән икәү яшибез. Фатирны улым укый торган гимназия яныннан алдым. Хәзер Нариманга – 12 яшь, иҗади сәләте нык сизелә, шигырьләр яза, рәсем ясый, режиссура белән кызыксына. Улым – Ходайның иң зур бүләге. Аллаһы Тәгалә исәнлек-саулыктан аермасын, – дип сөйләгән Intertat.ru хәбәрчесенә Илсөя Бәдретдинова.

4 февральдә Илсөянең гомер бәйрәме булды, аңа 35 яшь тулды! "Моңа кадәр туган көнемне үткәргәнем булмады, гел концертлар чорына туры килә иде. Быел бик матур урында якын кешеләрем белән билгеләп үттем. Зур-зур шарларга, искиткеч тортка, бүләкләргә нәни баладай сөендем, бәйрәмнән бик канәгать калдым", диде җырчы.