Нурзадәнең фотоальбомы: әти-әнисе, яшьлеге һәм сәхнә юлы турында истәлекләр

Бу юлы Татарстанның атказанган артисты Нурзадәнең альбомнарын карадык. Сүз уңаеннан быел ул юбилеен билгеләп үтте.

Әнине вафатына быел 10 ел. Әтинең вафатына ел ярым. Бу фотоларны кулга алгач та, күзгә яшьләр җыела. “Әти-әнигә балаларын соңгы юлга озатырга язмасын”, - дип телибез. Әмма балалар өчен дә газизләрен югалту - хәсрәт. Аларны искәалмаган көнем юк. Әнием режиссер булып эшләде. Беренче концертларыма сценарийны да ул язган иде. Әни - оптимист иде. Соңгы елларында мөмкинлекләре чикле кешеләр өчен коляскада йөрде. Әти белән санаторийга ялга киткәч тә: “Без дискотекага барабыз әле”, - дип әйтә иде. Бии алмаса да, карап торырга барды. Алар шундый хәрәкәтчән булды. Бервакыт әти белән әнине эзләп, борчылып беттем. Телефоннарын алмыйлар. Соңыннан әни: “Әтиең белән гөмбәгә бардык”, - дип шалтыратып әйтте. Әти нинди гөмбә күргән, барысын җыеп алып килгән. Әни шуларның ашарга яраклы булганын чүпләп утырган. 

Мәктәпне тәмамлагач, чит телләр факультетына укырга кердем. Белемем буенча француз һәм инглиз телләре укытучысы. Казанның 71 нче мәктәбендә укыттым. Мин укыткан мәктәптә Мәгариф һәм фән министры Илсур Һадиуллин завуч иде. Ә фотода булган костюмны мин үз кулларым белән тектем. Беренче сентябрьгә өлгерәм дип, төннә тегеп бетердем. 

Биюләрне бик яратам. Балачактан биюче булырга хыялландым. Хәзер дә бию көе яңгыраса утырып тора алмыйм. Шәрык биюләре, фламенко, бачатага да йөрдем. Тамашачылар: “Элек сез бии-бии җырлый идегез, нишләп биимисез?” - дип сорадылар. Шуңа күрә үземнең концертка биюләрне яңартырга уйлыйм.