Ренат Галиәскәр: ”Кеше өйләндереп, өйләнергә өйрәнеп йөрим"

Бүген дә шул як кешеләренең берсе турында кыска гына язма әзерләргә булдым әле.

Көндәлек тормышта Ренат Галиәскәрне тоту бик үк реаль хәл булмаганга (чөнки ул нигездә тәүлек буе эшли), "ярый әле телефон бар" дип сөйләнә-сөйләнә,эш вакыты булуга карамастан Ренатка шалтыраттым...

..."Бар кешегә бирелсә дә куәт ,
Биек таулар атлап үтәрлек,
Йөрәкләргә салынмаган икән,
Шул куәтне җигәр үҗәтлек.

Ялгышалар бөркетләргә тиңләп ,
Үз иткәнне кыя-тауларны,
Таулардан да биек күтәрелгән,
Күгәрченнәр җирдә бик азмы?!..."

Ринат Галиәскәр сүзләренә язылган җырдан бу юлллар. Үзенә генә хас уйчанлык, фәлсәфә, тагын нидер бар шунда.Бүген ул утызлап җыр авторы, шактый гына үзе әзерләгән юмор номерлары да бар.

- Нәрсә белән шөгыльләнәсең син, Ренат?
- Концертлар, туйлар, бәйрәмнәр алып барам. Шигырьләр язам.

- Анысын беләбез, әле эшләп тә йөрисең бугай бит син.
- Әйе. Бер юл төзелеше белән шөгыльләнүче фирмада кәгазь эшләрен алып барам. Иртәнге алтыда чыгып кителә, кайвакыт төнге уникедә генә кайтып керелә.

- Ә иҗатка вакыт?
- Эш арасында инде.

- Син дә юмор яратасың, шигырьләр язасың, бертуган абыең Айдар Галиәскәр дә танылган "Рәвешләр" юмор театрында уйный. Иҗадилек каян килгән Борнак егетләренә?
- Кайчандыр, авылларда гастрольләрдә йөргәндә, безнең өйдә Сара апа Садыкова кунып чыккан булган диләр. Бәлки шуңардандыр? (көлә)

- Фатир алгансың дип ишеттем..
- Фатир түгел, әлегә ипотека гына...

- Соң,өйләнмәгән дә бит әле син. Инде утызга җитәсең үзең...
- Атна саен диярлек, кеше өйләндереп, өйләнергә өйрәнеп йөрим.

- Чынлап әйткәндә иҗатка тартылу сезгә каян килгән ул?
- Әтинең әтисе, аны Хуппа бабай дип йөртә торган булганнар, бик җор телле, җырларга, биергә яратучы кеше булган. Шуның каны уйный бугай.

- Син үзең дә җырлыйсыңмы әллә?
- Ваннада яки мунчада булганда гына.

- Ялгышмасам, син Һава десантлары гаскәрләрәрендә хезмәт иткән егет... Авыр булдымы?
- Ул чакларны рәхәт бер чор итеп искә алам...

- Бәхетсез мәхәббәт, дуслар хыянәте синең өчен ят нәрсәме?
- Кавыша алмаган мәхәббәтләр булмады түгел - булды. Хәзер утызга җиткәндә "яратмадым мин" дип тора алмыйм. Тегесе дә булгандыр. Тормыш бит бу.

- Авылга еш кайтасыңмы?
- Минем туган авылым, Балтач районынының Борнак иле авылы. Мин аның патриоты. Әз генә мөмкинлегем булу белән кайтам мин анда. Авыл - бәгырьдә инде...

- Киләчәктә, иҗади яктан синннән ниләр көтәргә?
- Шигырьләр көн дә диярлек туып тора, әле менә беренче җыентыгымны әзерләп ятам. Шул, төнлә эштән кейткач инде. Тупланган афоризмнарым да бик күп, барысын да җыеп бер туплап чыгарасы иде.

- Рәхмәт, Ренат, уңышлар сиңа!
- Рәхмәт.Тырышырмын инде....