#Шоу-бизнес 24 апрель 2026, 13:43

Рөстәм Нәбиев Мера пик тавын яулаган

24 апрель 2026, 13:43

Танылган блогер Рөстәм Набиев яңа үрләр яулаган.

Скопировать ссылку

Танылган блогер Рөстәм Набиев яңа үрләр яулаган.

Ул Непалда иң биек тауларның берсе Мера Пик – 6 мең 476 метр биеклектәге Мера Пик ноктасына менгән. Рөстәм Набиев – пара-альпинист. Ул тауга бары куллар ярдәмендә генә менгән. 2015 елның 12 июлендә Омск шәһәрендә булган фаҗигане хәтерлисездер: казарма җимерелеп төшеп, 24 солдат һәлак булды, 19 кеше яраланды.

Гомерлеккә гарип калганнар арасында Башкортстанның Чакмагыш районы егете Рөстәм Нәбиев тә бар. Үзенчәлекле сәяхәт турында блогер социаль челтәрдәге язылучыларына сөйләгән.

– Мера Пик тавына менүне иртәнге сәгать 5 тә башладык. Һава торышы бик яхшы иде. Без чагыштырмача тиз бардык. Башка альпинистлардан артта калмадык. Һәр метрны үтү өчен бик күп тир түгәргә кирәк. Моңа өстәп мин тауга куллар ярдәмендә генә мендем. Бу биеклеккә менүемә бик шат. Авыр булды, яшермим. 21 апрель – әтигә 60 яшь тулган булыр иде. Ул һәрвакыт мине саклап, яклап тора дип ышанам. Бу җиңүемне аңа багышлыйм. Әти минем белән горурланадыр... Мин яшәүне, тормышны яратам. Никадәр кыен булса да, миңа язганны горурлык белән кабул итәм, алга барам. Бу әле безнең юлыбызның кечкенә генә бер өлеше. Хәзер иң мөһиме аска төшеп хәл җыярга һәм иң мөһим адымга әзерләнергә: алда Эверест. Бу дөньяда яшәүдән дә кадерле әйбер юк, – дип сөйли Рөстәм.

Рөстәм Набиев дөньядагы иң биек тауга менәргә җыена. Аның биеклеге 8 мең 848 метр. Рөстәм Нәбиевның Эльбрус, Килиманджаро, Аконкагуа һәм Манаслу тауларына менгәне бар.
Уңышлар телибез!

Кызыклы яңалыкларны күзәтеп бару өчен безнең МАХ каналына кушылыгыз.