Дилия Әхмәтшина "Тюрквидение"дә нинди җыр башкарырга җыена?

Җырчы Дилия Әхмәтшина Төркиянең Истанбул шәһәрендә узачак "Тюрквидение" җыр фестивалендә катнашырга җыена. Дилия биредә Татарстанны тәкъдим итәчәк.

"20 декабрьдә узачак фестиваль быел онлайн форматта үткәрелә. Мин анда чакыру буенча барам. Татарстаннан мин генә булачакмын. Республикабызны тәкъдим итү, аның данын яклап чыгыш ясау өчен минем өчен зур җаваплылык", - ди Дилия Әхмәтшина.

Дилия 9 яшеннән бирле җырлый. Ул үзен төрле стильдә һәм жанрда сыный, һәрвакыт эзләнүдә. Төркиядә узачак фестивальдә Дилия "Гафу ит, авылым" җыры белән катнашачак. Җырның авторлары - Фәүзия Гайнанова, Фәрит Әхмәтшин. Шулай итеп, Татарстан кызы "Тюрквидение"дә татар җырын башкарачак!

"Тюрквидение" фестивале җиңүчесе жюри әгъзаларының тавыш бирүе нәтиҗәсендә билгеләнәчәк. Жюри составы төрле төбәк вәкилләреннән тупланган. Фестивальне туры эфирда Истанбулның ТМВ каналының tmb.tv cайтында 16:00 сәгатьтә карарга мөмкин.

Дилиягә зур уңышлар һәм җиңү телибез!

Эльвира Шакирова