Венер Сәлимов башлык кәнәфиеннән киткән. Кем мәҗбүр иткән? Сәбәбен белештек

Ләкин җиң сызганып эшләп йөргән яшь җитәкче, ни сәбәпледер, дәүләт хезмәткәре камытын салып, кабаттан иҗатка әйләнеп кайтты. 
– Венер, сине кабаттан сәхнәдә күрүебезгә бик шатбыз. Ләкин серен дә беләсе килә, язмыш сукмагының чуалуымы, әллә иҗат ялкынының кабат үрләп алуымы? 
– Адәм баласын язмыш дигәне төрле сукмаклар буйлап үзе йөртә анысы. Богородское авылы мәдәният йортында эшләгәндә Питрәч районының Шигали авылы җирлеге башлыгы вазыйфасына кодаладылар. Яшь чак, эшләп карыйм әле дидем. Җиңел хезмәт түгел чынлыкта, әмма начар эшләмәдем. Шактый гына дәүләт программаларына керә алдым. Иң зур җирлек ул – 4 авыл, 3 торак комплексы, 8 бакчачылык ширкате керә. Кышын юлларны чистарттырып торуы гына да мең балә. Барлыгы 200 чакрым юл чистарттырасы, арада кайберләренең сабырлыгы җитми, шалтырата, сүгенә, прокуратага язам, ди. Диван критиклары күбәйде. Бөтенесе дә андый түгел, нигездә халык әйбәт. Шунысы да бар, Россиянең төрле төбәкләреннән җыелган халык яши Шигалида, һәрберсенең холкына җайлашасы, уртак фикергә килеп, сүз беркетәсе дигәндәй. 

– Җанга тигән, мәңге дә күңелдән китмәс кайсы борчулар истә калды?
– Күрше белән күршенең юктан да талашып, ике арадагы бәхәсне су буе үстерүе, бер-берсе белән дошманлашып яшәве. Икесен дә җайлыйсың, татуланырга үгетлисең – нәтиҗәсез! Бер генә яшибез, заманы да барлыклы, тормышлар бик рәхәт, тик татулык җитми. Аннары, чүпне капчыклап җыеп йөрү системасы да зур проблема булып сыртын кабарта. Кышкы бураннарда кайберләренең капка төпләренә барып җитә алмыйлар. Шуннан тегесе әлеге дә баягы туп-туры прокуратага хат яза. Китә чуалыш... Суд аша безгә чүп җыяр өчен махсус контейнерлар булдырырга йөкләнә. Урамда 100 хуҗалык булса, шуның 99ы моңа каршы. Чөнки чүп контейнерына ел әйләнәсе күселәр ияләшә, шуңа да чүпне капчыклап җыеп китүләре хәерле.

– Уңышлар да сөендергәндер инде.
– Ел саен үзара салым акчасы җыеп кына да тау күчерердәй эшләр башкардык. Юлларны карап тордык, балалар мәйданчыгы ясаттык, канализация торбаларын яңартасы идек. 4 ел авыл җирлеге башлыгы булып эшләгәч, арып-туеп, дигәндәй, үткән елның декабрь аенда гариза яздым да, китеп тә бардым. Районда да матавыклы чак иде, китүемне күпләр белми дә калды. Яшьләргә юл бирмиләр, эшләргә теләк тә, егәр дә бар, ләкин синнән алда тәҗрибәлерәкләргә юл бирелә... Хәерле булсын, мин бик әйбәт эшләдем, менә миннән соң эшли башлаучыга тагын да авыррак, чөнки кануннар да көнлек үзгәреп, кырысланып тора.

– Сагындырган идеме?
– Мин сәхнәдән китеп үк тә бетмәдем. Авыл җирлегендә гел концертлар куеп торгаладык, аннары туйлар, банкетларга да заказ булгалап торды. Дәүләт эшеннән киткәч, ул банкетлар тагын да арта төште. Яңа җырлар өстендә эшли башладым. Җырларым болай да күп иде, шуларны яңартам. Әлегә Ринат Рахматуллин төркемендә алып баручы булып эшлим. Сәхнәгә әйләнеп кайту да җиңелләрдән түгел, бик чыгымлы. Иң мөһиме, исәү-сау булыйк, – ди ул. 

Венер Сәлимов гаиләсе белән Питрәч районының Камышлы авылында яши. Хатыны Илвина белән ике бала үстерәләр.

Тагын укырга: “Әрмән түгел, татар мин” дип җырлап йөргән Венер Сәлимов хәзер түрә булып эшли