Җәвит Шакиров сөеклесе Зөлфиянең юбилеена нәрсә бүләк иткән?

- 50 яшем Федераль Сабан туена туры килгәнгә күрә, туган көнемә иң якын дусларыбыз килә алмый калды. Быел инде карантин аркасында туган көнне октябрьгә күчердек. Аңа кадәр бу хәлләр тәмамланыр, дип көтәбез. Быел сюрпризлар 26сында төнге 12дә үк башланды. Җәвит белән көне-төне котлаулар кабул иттек, телефон тынмады. Башкортстаннан доставка белән бик күп бүләкләр, күчтәнәчләр килде. Кайбер дусларыбыз маска белән генә булса да, урамнан гына котлап китте. Туган көнне өйдә гаиләбез, кодаларыбыз белән билгеләп үттек, - дип сөйләде безгә Зөлфия Шакирова.

Татарстанның халык артисты Җәвит Шакиров сөеклесенә ак төстәге өр-яңа Toyota RAV4 машинасы бүләк иткән. "Җәвит абыеңның яңа машина алып бирәм, дигән сүзе бар иде. Машинам искерде, 7 ел йөрдем. Ләкин шуны әйтим, машина мактана торган әйбер түгел, хәзер аның белән беркемне дә шаккатырып булмый. Улларым Илһам белән Искәндәр тандыр, киленем белән оныклар алка бүләк итте. Мин балалардан бүләк көтмәдем, алар үзләре бүләк бит. Минем өчен иң мөһиме - сәламәтлек. Балалар, оныклар сәламәт булсын. Тормышның ямен-тәмен белеп яшәргә язсын. Аллаһы Тәгалә сәламәтлектән, тигезлектән аермасын", - диде Зөлфия Шакирова.