ТМТВ премиясен тапшыру тантанасында 55 җырчы катнашачак

«Барс-Медиа» татар медиа группасы башкарма директоры Динә Гәрәева "ТМТВ" премиясен тапшыру тантанасының быел дүртенче тапкыр узуын әйтеп, елдагыча аның рекордларга бай булачагына ишарәләде.
– Быелгы тамашабызда 55 җырчы 45 номинациядә ярыша. Сәхнәдә 60тан артык биюче, 10 дуэт, барысы 48 номер булачак. Концерт, башка еллардагы кебек үк, алты сәгать дәвам итәчәк, – диде ул журналистларга.

Концерт сәгать биштә башлана, ә менә җырчыларның кызыл келәмнән узу тантанасын сәгать өчкә куйганнар. Кызыл келәм дигәннән, быел тамашаның бу өлешендә яңалык бар. Келәмне бу юлы "Пирамида" эчендә җәячәкләр.
 
ТМТВ каналының баш мөхәррире һәм тамашаның режиссеры Алмаз Гыйльметдинов моны һава шартлары белән бәйләп аңлатты.

– Концерт март аенда уза, җырчылар җылы киемнәргә төренеп кереп, матур, кыйммәтле күлмәкләрен күрсәтә алмый, – диде ул.

Тамашага килә алмаучылар аны телевизордан турыдан-туры эфирда күзәтә ала. Билетларга килгәндә, яхшы урыннарга алар сатылып беткән диярлек.

Татарстанның атказанган артисты, премия тапшыру тантанасының алып баручысы Гөлназ Сәфәрова яңа экспериментлар ясарга курыкмаулары, яңалыклар кертергә тырышулары һәм тамашачының хәтерендә калачак тамаша әзерләнәчәген әйтте.

– Концерт түгел, нәкъ менә тамаша булачак. Шул ук вакытта аңа бер мәгънә дә салырга тырышабыз. Җырларның авторлары һәм композиторларын да сәхнәдә күреп булачак. Тамашыбз шәп булачак! – диде ул.
Алып баручылар алтау булачак. Гөлназ Сәфәрова сәхнәгә кемнең кем белән чыгачагын әйтеп тормады. Фамилияләрен генә санап китте, алар: Гөлназ үзе, Иркә, Айваз Садыйров, Айрат Ильясов, Рамил Шәрәфиев, Рамил Шәрәпов.

Фото: Татар-информ