Җырчы Илшат Сафин: «Сөйгән ярым белән никах укыттык»

Әмма игътибарлы тамашачылар Илшатның кулында балдагы барлыгын күреп алган. Илшат Сафин белән сөйләшеп гаилә хәленә ачыклык керттек.

- Илшат, шәхси тормышың турында сөйләмисең диярлек. Социаль челтәрдә дә, гадәттә, җырларыңны куеп барасың. Ни өчен? 

– Тынычлыкта – рәхәтлек. Бәхет – тынычлыкны ярата диләрме әле. Бөтен булганны сөйлисем, күрсәтәсем килми. Мин аны кирәк дип тапмыйм.

– Кулыңда балдак, димәк йөрәгең буш түгел?

– Дөрес. Сөйгән ярым белән никах укыттык.

– Бу сөенечле вакыйга белән дә уртаклашмадың кебек? Сөйгәнеңнең кем икәнен дә белми калдык. 

– Социаль челтәрдә күренеп алды ул. Кемдер игътибар итте, кемдер күрмичә калды. Никахлашканыбызга ике ел була инде. Димәк, яхшы яшергәнмен. Никахны якыннар, туганнар белән генә үткәрдек. 

– Кайда таныштыгыз соң?

– Социаль челтәрләрдә. Тормыш иптәшем яңа чыккан җырымның исемен сорап язган иде. Менә шуннан аралаша башладык. Сиңа буласы әйбер тешне сындырып керә диләр бит. Безнең кавышу да шулайрак булды. 

– Хәзер җырчы шәхси тормышын күрсәтмәсә, таныла да алмый кебек.

– Юк, мин бу сүзләргә ышанмыйм. Барыбер чын тугры тамашачылар синең иҗатыңны яратса, синең чыгышларыңны көтеп алса, кабул итсә гел янәшәдә булачак. Мине хөрмәт иткән, җырларымны яратып тыңлаган тамашачыларыма рәхмәт әйтәсем килә.