#Сорау-җавап 30 ноябрь 2025, 13:11

Чит ил паспортындагы хата: акча «янса», кем җавап бирә?

30 ноябрь 2025, 13:11

Чит ил паспортында исемем «Халидя» дип язылган, ә Россия документларында — «Халида». Шушы аерма аркасында мине теркәлү базасы аша үткәрмәделәр, акчаларым янды. Моның өчен кем җавап бирергә тиеш? Халидә Хәйретдинова, Казан

Скопировать ссылку

Чит ил паспортындагы хата: акча «янса», кем җавап бирә?

Адвокат Марат Гайнуллин җавап бирә:

Кызганычка каршы мондый хәлләр сирәк түгел. Быел гына да дистәләгән россияле чит ил паспортындагы хаталар аркасында ялга очып китә алмаган.
Сентябрь башында кайбер гражданнарга «җенес», «гражданлык», «бирү датасы» кебек графалардагы текстлар тиешле урынга түгел, ә алар өстенә язылган документлар бирелгән. Мондый паспортлар дефектлы дип санала һәм чик буе постлары аша үткәрелми.

Кайбер очракларда туроператорлар документтагы хатага алдан игътибар иткән һәм паспортны алыштырырга киңәш иткән. Дефект, нигездә, биш еллык паспортларда күзәтелгән.

Хата белән ясалган документ белән илгә кереп булса да, кунакханәләрдә проблема туа: хезмәткәрләр мәгълүматны сканерлый алмый һәм туристтан документны яңадан рәсмиләштерүне таләп итә.

Җәй көне шундый хәл Таиландка җыенган гаилә белән дә була: хатынының паспортында «җенес» графасында ялгыш «М» хәрефе язылган була, һәм аны илгә кертмиләр. Суд Россия Эчке эшләр министрлыгын гаепле дип таба һәм гаиләгә якынча 226 мең сум компенсация түләттерә.

Кем җаваплы?
Документны дөрес итеп рәсмиләштерү — дәүләт органының бурычы. Әгәр хата паспорт биргән вакытта җибәрелгән икән, төп гаепле — документны әзерләгән орган, ягъни Эчке эшләр министрлыгы (яки чит илдә бирелгән булса — Тышкы эшләр министрлыгы).
Турист түбәндәгеләрне эшли ала:
Министрлыкка рәсми дәгъва җибәрү.
Анда документтагы хата аркасында күрелгән чыгымнарны каплауны таләп итәргә мөмкин.
Дәгъваны караудан баш тартсалар — судка мөрәҗәгать итү.
Суд практикасы туристлар файдасына. Эчке эшләр министрлыгы күп очракта зыянны каплый. Кайбер шикаятьләрдә тур һәм билет бәяләрен дә кайтарганнар, өстәмә рәвештә мораль зыян өчен 50 мең сумга кадәр түләнгән.
Документ күчермәсен алдан алган туроператорны да җавапка җәлеп итү мөмкин.
Әгәр туроператор документны тикшергән һәм төгәл күренеп торган хатаны абайламыйча юллама саткан икән — алар да җавапчы була ала.

Кызыклы яңалыкларны күзәтеп бару өчен безнең МАХ каналына кушылыгыз.